Mövsüm sona yaxınlaşdıqca hər xal qızıl dəyəri qazanır.

Artıq turnir cədvəlinin yuxarı hissəsində elə vəziyyət yaranıb ki, xırda bir səhv komandanı liderlər qrupundan 3-4 pillə geri atır. Söz yox, “Qəbələ”nin elitadan düşməsi tezliklə, hətta bəlkə elə gələn tur rəsmiləşəcək. Amma bu futboldu, hər şey ola bilər. Necə ki, heç kim gözləmədiyi halda, “Qarabağ” Masazırda “Sabah”a uduzdu.

Turun açılış matçında qonşu pillələrdə yer alan “Sumqayıt”la “Zirə” üz-üzə gəldi. 2-ci yerə iddialılardan sayılan komandalar heç-heçə ilə kifayətlənərək hərəyə 2 xal itirdi. Bəlkə də bu nəticə hər ikisinə sərf edir. Çünki yenə də ilk “dördlük”də qərarlaşıblar. Ancaq “Zirə”nin məhz xal itkisi sayəsində 2-ci pilləni əldən verməsi də reallıqdı.

“Qəbələ” “doğma divarlar” arasında da hadisələrin uğursuz axarına son qoya bilmədi. Əksinə, komandanın aşağı liqaya düşmək təhlükəsi daha da artdı. “Qırmızı-qaralar” Kaxaber Sxadadzenin rəhbərliyi altında ilk qələbəni qazanmağın biraddımlığında olsalar da, cəmi 10 dəqiqə dözmədilər. Tədricən yüksəlməkdə olan “Turan Tovuz” isə mövsümün əvvəlində autsayderlər sırasında görünsə də, Ayxan Abbasovun idarəçiliyi, oyunçunun potensialından düzgün yararlanmaq bacarığı komandanı iddialılar sırasında qərarlaşdırır. Hazırda tovuzluları 2-ci pillədən cəmi 5 xal ayırır.

Nəticələrin getdikcə pisləşdiyini görən “Araz-Naxçıvan” rəhbərliyi komandanı region liqasından bura qədər gətirən Azər Bağırovla yolları ayırdı, “Qəbələ”ni böhrandan çıxara bilməyən Elmar Baxşıyevi xilaskar kimi gördü. Komanda Baxşıyevin rəhbərliyi altında çıxdığı ilk oyunun elə 1-ci dəqiqəsində qapısında top görməklə bəlkə də hansısa siqnal verdi. “Neftçi” isə mövsümdə ən rahat qələbələrindən birini qazanaraq, turnir cədvəlində yenidən 2-ci pilləyə yüksəldi.

Turun ən dramatik matçı Bayılda keçirildi. Gəncəlilərin önə keçməsi, ardından “dənizçilər”in möhtəşəm geridönüşü, Kvirkviyanın sonuncu dəqiqədə vurduğu baxımlı qolla hesabın bərabərləşməsi tamaşaçılara əsl futbol həzzi yaşatdı. Bəzən komandalardan heç birinin qələbə qazanmadığın oyundan da ləzzət almaq olur. Bayıla toplaşan neytral azarkeşlər “Sumqayıt” - “Zirə” matçındakı kimi darıxmadı. Qələbə “Kəpəz”ə elitada qalmasını daha tez təmin etmək baxımından necə lazım idisə, “Səbail” də iddialılar sırasından uzaq düşməmək istəyirdi.

Turun sonuncu oyununda gözlənilməz nəticə qeydə alındı. “Qarabağ”ın premyer-liqadakı 18 oyunluq məğlubiyyətsizlik seriyasını Krunoslav Renduliçin “Sabah”ə qırdı. Sözsüz, bu nəticə cari mövsümün çempionuna heç bir təsir göstərmədi. Amma geriləməkdə olan “bayquşlar”ın özünəinamı qaytarmasında böyük rol oynadı. Həm də “Sabah” cari “futbol ili”ndə “Qarabağ”a daha çox qol vurmaq üzrə “ixtisaslaşıb”.

Misli premyer-liqası
4-cü dövrə, 30-cu tur
12 aprel
Sumqayıt – Zirə 0:0
13 aprel
Qəbələ - Turan Tovuz 1:2
Neftçi – Araz-Naxçıvan 3:0
14 aprel
Səbail – Kəpəz 3:3
Sabah – Qarabağ 3:2
1. Qarabağ 30 23 3 4 83-29 72
2. Neftçi 30 13 8 9 39-30 47
3. Zirə 30 12 10 8 26-18 46
4. Sumqayıt 30 11 11 8 28-33 44
5. Sabah 30 12 7 11 42-37 43
6. Turan Tovuz 30 11 9 10 46-40 42
7. Səbail 30 10 9 11 45-49 39
8. Araz-Naxçıvan 30 8 8 14 28-42 32
9. Kəpəz 30 8 7 15 35-57 31
10. Qəbələ 30 4 4 22 21-58 16
Bombardirlər: Olavio Juninyo (Qarabağ) – 17, Aleksandr Ramalinqom (Səbail) - 12, Yassin Benzya (Qarabağ) – 11, Nəriman Axundzadə (Qarabağ) – 10.
Növbəti turun proqramı
19 aprel, 16.30. Turan Tovuz – Sumqayıt
20 aprel, 16.30. Qarabağ – Qəbələ
20 aprel, 19.00. Zirə - Neftçi
21 aprel, 16.30. Kəpəz - Sabah
21 aprel 19.00. Araz-Naxçıvan – Səbail

KAMAL SƏFƏR