Fransa çempionatında dünən mövsümə yekun vuruldu.

Çempionluğu daha öncə rəsmiləşdirən PSJ son turda öz meydanında ''Mets''i 5:0 hesabı ilə darmadağın etdi. Kilian Mbappenin het-trik etdiyi görüşdə digər qolları Neymar və Anxel Di Mariya vurdu. Neymar parislilərin heyətində 144-cü rəsmi oyunda yubiley - 100-cü qolunu vurdu.

Braziliyalı forvard bununla da Dominik Roşotoya çataraq PSJ tarixində 100 qol həddinə çatan 6-cı futbolçu oldu. İndi Neymar bu klubda qol sayına görə yalnız Pedro Pauleta (109), Zlatan İbrahimoviç (156), Mbappe (171) və Edinson Kavanidən (200) geri qalır. Neymar yubiley qolunu vurmaqla daha bir diqqətçəkən göstəriciyə nail oldu. O, futbol tarixində Kriştiano Ronaldo və Romariodan sonra 3 fərqli klubun heyətində 100 qol həddinə çatan 3-cü futbolçu oldu. ''Sambaçı'' daha öncə şərəfini qoruduğu ''Santos'' və ''Barselona''da da 100 qol həddini keçmişdi. Kriştiano Ronaldo bunu ''Mançester Yunayted'', ''Real'', ''Yuventus'', Romario isə PSV, ''Vasko de Qama'' və ''Flamenqo'' ilə bacarıb.