“Beşiktaş”da ab-hava yenə gərgindi.

"Football-plus.az" xəbər verir ki, İstanbul nəhəngi evdəki derbidə “Qalatasaray”a uduzandan sonra ötən tur səfərdə “Qaziantep”ə də boyun əydi. Halbuki
Fernando Santuş bu mövsüm komandanı çalışdıran 5-ci fərqli məşqçidi. Ardıcıl 2 məğlubiyyətdən sonra camiədə Santuşa inamsızlıq yaranıb.

Ümumiyyətlə, statistik göstəricilərə nəzər salsaq, görərik ki, təcrübəli portuqaliyalı mütəxəssisin təyinatından bəri komandada yaxşılığa doğru heç nə dəyişməyib!

Məsələn, gözəçarpan ilk məqam məhsuldarlığın kəskin dərəcədə aşağı düşməsidi. “Beşiktaş” Santuşla superliqada oynadığı 10 qarşılaşmada cəmi 9 qol vurub ki, bu da orta hesabla hər oyuna 0,9 qol deməkdi. Bu, cari mövsüm “Qartal”da çalışmış baş məşqçilər arasında ən pis göstəricidi! Komanda mövsümə Şenol Günəşlə başlamış və ilk 7 turda 10 (hər oyuna orta hesabla 1,42) qol vurmuşdu. Günəşdən sonra komandanı qəbul edən Burak Yılmazın dönəmində “ağ-qaralar” 4 tura 7 dəfə (1,75) fərqləndilər. Camiə üçün önəmli isimlərdən olan Rza Çalımbayın dönəmində “Beşiktaş” 5 tura 6 qol (1,2) vurdu. Və nəhayət, Santuşdan öncə 3 oyunda komandanı meydana çıxaran Sərdar Topraktəpə 7 qolla komandanı bu mövsüm orta hesabla ən yüksək (2,3) məhsuldarlığa çatdıran məşqçi oldu. Santuşla məhsuldarlığın aşağı düşdüyünü sübut edən daha bir məqam odu ki, komanda superliqada keçirdiyi 10 oyunun cəmi 4-də qol vurduğu halda, 6-da meydanı qolsuz tərk edib. Digər problem “Beşiktaş”ın hesabda geriyə düşdüyü oyunlarda aciz təsir bağışlamasıdı. İstanbul nəhəngi Santuşla superliqadakı 10 oyundan 4 qələbə, 2 heç-heçə, 4 məğlubiyyətlə ayrılıb. Heç-heçələrin hər biri qolsuz başa çatan qarşılaşmalardı. Yerdə qalır 4 qələbə və 4 məğlubiyyət. Məhz bu məqamda çox qəribə bir mənzərə ortaya çıxır. “Beşiktaş” Santuşla hesabı açdığı 4 qarşılaşmanın hamısında qol buraxmadan qalib gəlibsə, digər tərəfdən hesabda geri düşdüyü 4 qarşılaşmanın hamısında qol vurmadan (!) məğlub olub. Başqa sözlə desək, “Beşiktaş” bu məşqçi ilə hesabı açırsa, deməli, 100 faiz qalib gəlir, ilk qolu buraxırsa, deməli, 100 faiz məğlub olur! Halbuki “Qartal” Santuşa qədər bu mövsüm superliqada ilk qolu buraxdığı 7 oyunun 6-da ən azı 1 qol vurmağı bacarmışdı. Komandanın Santuşla hesabda geri düşdükdən sonra vəziyyəti dəyişə bildiyi yeganə oyun kubokda səfərdə “Antalyaspor”a qarşı olub. Həmin görüşdə “Beşiktaş” fasiləyə geridə yollansa da, ikinci hissədə 2 qol vuraraq 2:1 qalib gəlmişdi. Yeri gəlmişkən, belə görünür, Santuşu bu vəzifədə yalnız ölkə kubokunun qazanılması saxlaya bilər. Türkiyə mətbuatının yazdığına inansaq, rəhbərlik məşqçiyə “vəzifəndə qalmaq istəyirsənsə, bizə kuboku gətir” şərtini irəli sürüb. 69 yaşlı məşqçinin dönəmində komandanın yeganə artan göstəricisi qapıya zərbələrlə bağlıdı. Özü də burda söhbət qeyri-dəqiq zərbələrdən gedir. Digər - məhsuldarlıq, qol gözləntisi, real qol vəziyyətləri, “çərçivə”yə zərbə, rəqibin cərimə meydançasında topla oynamaq, topa sahib olmaq, meydanın rəqibə aid hissəsində dəqiq ötürmə, hücum bölgəsində dəqiq ötürmə, irəlidə top qazanmaq kimi göstəricilərdə isə “Beşiktaş” Santuşla geriləyib. Bu məşqçinin heyət seçimi də yavaş-yavaş suallar doğurmağa başlayır. Əfv edilərək əsas komandaya qaytarılan Abubakar hələ də “Beşiktaş”ın bu mövsüm rəsmi oyunlarda ən məhsuldar futbolçusudu. Amma Santuşun dönəminə təcrübəli kamerunlu forvard bir dəfə də start heyətində meydana çıxmayıb. “Beşiktaş”ı bu həftəsonu evdə Sərgən Yalçının “Antalyaspor”u ilə oyun gözləyir.