Dünən futbol üzrə ölkə çempionatının 1-ci liqasında 14-cü tura start verildi.

Gün ərzində iki matç keçirildi. MOİK səfərdə “Mingəçevir”i 1-ci dəqiqədə vurduğu qolla məğlub etdi. Belədə ordu klubu ilk “dördlük”də möhkəmləndi. İkinci görüşdə “İmişli” “Difai Ağsu”ya qalib gəldi. Aşkar favorit sayılan meydan sahibləri rəqibini çətinliklə məğlub etdi. Əsgər Abdullayevin komandası hələ ki ikincidi. Durumun dəyişib-dəyişməməsi isə bu gün keçiriləcək qarşılaşmalardan asılıdı. “İmişli”nin pilləsinə yiyələnmək iddiasında olan komanda “Şamaxı”dı. Bəli, “şirlər” “İrəvan”la matçda məhz bu məqsədlə mübarizə aparacaq. Görüşün doğma meydanda olması Ramiz Məmmədovun yetirmələri üçün xüsusi məqamdı. Digər tərəfdən, qonaqların düşərgəsində qarışıqlıq davam edir. “İrəvan” əsasən də maliyyə problemindən əziyyət çəkir. Komandanın çempionluq uğrunda mübarizədən çəkilməsi də bunun faktiki sübutudu. Hər halda, Nazim Süleymanovun yetirmələri son dörd turda, sadəcə, turnirin ən zəifini – “Araz Saatlı”nı məğlub edə bilib. “Araz Saatlı” demişkən, baş məşqçi Rüfət Quliyev qələbənin formulunu tapmaqda çətinlik çəkir. Komanda bu tur son həftələrdə gücünə güc qatan “Zaqatala”nı qəbul edəcək.

Tura “Qaradağ Lökbatan” – “Karvan” matçıyla yekun vurulacaq. Azər Həşimovun komandası ilin ilk matçında xal itirib. Odu ki, bu dəfə ev yiyəsi qismində 3 xal əldə etməlidi. Yoxsa liderlik kürsüsü ciddi təhıükəylə üz-üzə qalacaq. Əlbəttə, lökbatanlılar “Şamaxı”nın onlara çatmasını arzulamır. Belədə gərgin matç izləyəcəyimizə şübhə yoxdu. Düşüncələrimizi rəqibin “Karvan” olmasıyla da əlaqələndirmək mümkündü. Yevlaxlılar ilə iddialı MOİK-i məğlub etməklə başladı. İndi ordu klubuyla 4 xallıq fərqi “əritmək” imkanına sahibdilər. Bundan başqa, yeni transfer Budaq Nəsirovun məhz bu görüşdə debüt etməsi gözlənilir.

14 fevral
Mingəçevir – MOİK 0:1
Ramil Orucov, 1.

İmişli – Difai Ağsu 1:0
Elnur Cəfərov, 79.

15 fevral
Şamaxı – İrəvan 2:0
Abbas Ağazadə, 14. Ramin Əhmədov, 31.
Şamaxı, şəhər stadionu. Saat 15.00.

Araz Saatlı – Zaqatala 1:1
Rəvan Əvəzov, 86 - Nizami Səmədov, 42.
Saatlı, Olimpiya İdman Kompleksinin stadionu. Saat 15.00.

Qaradağ Lökbatan – Karvan 0:1
İzzət Müştaqov, 80
Lökbatan, Olimpiya İdman Kompleksinin stadionu. Saat 15.00.

Xal durumu: Şamaxı, Qaradağ Lökbatan - 28, İmişli - 26, MOİK - 25, Karvan- 24, İrəvan - 20, Zaqatala - 18, Mingəçevir - 14, Difai Ağsu - 7, Araz Saatlı - 4.
Bombardir: Elşad Tağıyev (Şamaxı) - 11.

KƏNAN BAHADIR