Srağagün və dünən Fransa kubokunun yarımfinal oyunları keçirildi.

"Football-plus.az" xəbər verir ki, elitanın ortabablarından “Lion”un rəqibi aşağı dəstənin sonuncu komandası “Valensyenn” idi. Lakazettin dublu “şirlər”in 2012-dən bəri ilk dəfə ölkə kubokunun finalına vəsiqə qazanmasına yardım etdi. Əslində Pyer Sajın çalışdırdığı komandanın başqa yolu da yox idi. Ölkə kuboku 2024/25 mövsümündə avrokuboklarda oynamağın ən asan yoludu. Oyun başlayan kimi hücuma atılan “şirlər” çoxsaylı hücum cəhdi fonunda ilk yarıda heç cür hesabı aça bilmədi. Əvəzində 2-ci hissənin əvvəlində oyunun taleyi həll olundu. Oyun yenicə canlanmışdı ki, referi VAR-ın da yardımı ilə Kaffonun Lakazettə qarşı kobudluğuna görə qonaqların qapısına penalti təyin etdi. “Zərərçəkən” özü “nöqtə”yə yaxınlaşdı və hesabı açdı. Cəmi 6 dəqiqə sonra fərq artdı. Bu dəfə də qapıçı Luşeni Lakazett məyus etdi. Sona 15 dəqiqə qalmış darmadağını rəsmiləşdirən qol vuruldu. 72-ci dəqiqədə meydana çıxan nigeriyalı Orban cəmi 3 dəqiqə sonra fərqləndi. “Lion” finalda dünən axşam keçirilən PSJ – “Renn” oyununun qalibi ilə qarşılaşacaq. Final oyunu mayın 25-də keçiriləcək.

Lion – Valensyenn (D-2) 3:0
Lakazett, 51-p.; 57. Orban, 75.
Lion: Perri, Mata (Meytlend-Nayls, 80), Çaleta-Sar, О`Brayen, Talyafiko, Matiç (Şerki, 72), Manqalya (Tolisso, 56), Kakre, Benrahma, Lakazett (Orban, 72), Nuama (Balde, 80).
PSJ – Renn 1:0
K.Mbappe, 40.

Yeri gəlmişkən...
Fransanın nüfuzlu “L'Equipe” nəşri “Lion” – “Valensyenn” oyununu idarə edən hakimlər briqadasının işinə hədsiz aşağı qiymət verib. Qadın referi Stefani Frappar 10 ballıq şkala üzrə 1 alıb. Nəşr onun idarəçiliyini “ikrah doğuran” təyini ilə ifadə edib. Xatırladaq ki, Frappar 2022-ci ildə kişilər arasında dünya çempionatının tarixinə ilk qadın referi kimi düşüb. O, Almaniya – Kosta-Rika oyununda əsas söz sahibi olub.