Ötən həftə Fransa kubokunda 2-ci finalçı da bəlli oldu. Gözlənildiyi kimi, elita təmsilçisi “Tuluza” aşağı dəstənin autsayderlərindən “Annesi”ni məğlub edə bildi.

İlk finalçının adı isə çərşənbə günü bilindi. “Qarabağ”ı Avropa Liqasının qrupunda saxlayan “Nant” gözlənilmədən evdə “Lion”u məğlub etdi. Böyük azarkeş dəstəyi altında oynayan “Nant” ilk yarıdakı dominantlığından yararlana bilmədi. Mutussaminin qolu qayda pozuntusu üzündən sayılmadı. “Şirlər” fasilədən sonra da dovşan kimi, yəni qorxaq oynadılar. “Nant” yeganə qolu 57-ci dəqiqədə vurdu. Təcrübəli Blas topu sinəsi ilə saxladı, bir hərəkətlə müdafiəçini işsiz qoydu və havada olan topu möhtəşəm zərbə ilə qapıya yönəltdi. Qonaqlar yalnız bundan sonra bir qədər fəallaşdı, Kakere, Lakazett və Barkola fərqlənmək imkanı qazandı. Ancaq qələbə hesabını qoruyan “Nant” ardıcıl 2-ci, tarixində 10-cu dəfə finala vəsiqə qazandı. Final fitindən dərhal sonra qazona axışan nantlı azarkeşlərin sevincini görməyə dəyərdi. Yeri gəlmişkən, ötənilki finalda “Nitsa”nı məğlub edən (1:0) komandanın “sükanı arxasında” da indi olduğu kimi Antuan Kombuare dayanmışdı. Tarixində 9 dəfə finalda oynayan “Nant” yalnız 1979, 1999, 2000 və 2022-ci illərdə qələbə qazanıb.

Digər yarımfinal oyununda aşağı dəstənin autsayderlərindən “Annesi” dönüşündən sonra elitada ilk mövsümünü keçirən “Tuluza”nı qəbul etdi. Qonaqlar 36-cı dəqiqədə hesabı açsa da, ilk yarıya artırılan 4-cü dəqiqədə Bozetti penaltidən yararlanıb yerli azarkeşləri ümidləndirdi. 1:1 hesabı 85-ci dəqiqəyə qədər qorundu. 64-cü dəqiqədə meydana çıxan 20 yaşlı yarımmüdafiəçi Şaibi komandasına qələbə gətirən qolu vurdu. Filipp Montanyenin çalışdırdığı “Tuluza” tarixində ilk dəfə ölkə kubokunun finalında oynayacaq. Aprelin 29-na planlaşdırılan həlledici oyun “Stad de Frans”da keçiriləcək.