ÇL-dən uzaqlaşan PSJ üçün “Brest”lə səfər oyunu da çətin alındı. Messi – Mbappe tandemi 90-cı dəqiqədə işə düşməsəydi, lider xal itirəcəkdi.

"Football-plus.az" xəbər verir ki, son dəqiqə qolu parislilərin xalını 66-a çatdırdı. “Strasbur”u qəbul edən “Marsel” 29-cu dəqiqədə azlıqda qalsa da, 2 qol vura bildi. Ancaq Aolunun son dəqiqələrdəki dublu Tudorun komandasına acı məyusluq yaşatdı. “Marsel” artıq PSJ-dən 10 xal geri qalır. Evdə “Reyms”ə uduzan “Monako” 3-cü yeri “Klermon”u darmadağın edən “Lans”a təhvil verdi. “Lill” – “Lion” duelindəki parlaq heç-heçəni də vurğulamağa dəyər.

“Brest”in qonağı olan PSJ-nin rəhbərliyi Qaltyenin ÇL-dəki uğursuzluğa görə qovulmayacağını bildirib. Fransa mediası isə öz aralarında baş məşqçini “bədən tərbiyəsi müəllimi” adlandıran bəzi futbolçuların bu açıqlamanı heç də xoş qarşılamadığını bildirir. Lider “Brest” önünə optimal heyətlə çıxsa da, motivasiyasızlıq problemi açıq-aşkar görünürdü. Hesab 37-ci dəqiqədə açıldı. Mbappenin uzaq məsafədən zərbəsindən sonra Bizot topu uğursuz şəkildə qaytardı, Soler təkrak zərbə ilə qapıçını məyus etdi. “Brest” gözlənlmədən 43-cü dəqiqədə “status-kvo”nu bərpa etdi. Bunu Ramosdan uzaqlaşan Onora bacardı. 2-ci hissə parislilərin üstünlüyü şəraitində keçdi. Bunun məntiqi nəticəsi kimi 90-cı dəqiqədə hesab dəyişdi. Messinin meydanın dərinliyindən verdiyi gözəl ötürmədən sonra təkbətək çıxan Mbappe qapıçını da arxada qoydu və komandasına qələbə qazandırdı.

“Marsel” – “Strasbur” oyununun 29-cu dəqiqəsində meydan sahiblərinin mərkəz müdafiəçisi Balerdi birbaşa “qırmızı” ilə qovuldu. Cari mövsümdə bir oyun da buraxmayan argentinalı komandasının əvəzedilməz oyunçusu sayılır. Tudor “qırmızı”ya görə dəyişikliyə ehtiyac görmədi. Qonaqlar çox aqressivcəsinə hücum edir, hesabı açmağa çalışırdı. İlk yarı qolsuz bitdi, hərçənd “Strasbur” zərbə sayına 12:1 öndə idi. 59-cu dəqiqədə Malinovskinin qapıçıdan dönən zərbəsini Mbemba tamamladı. 76-cı dəqiqədə qonaqların qapısına penalti təyin olundu və təcrübəli Sançes hesabı 2:0-a çatdırdı. Ancaq “Marsel” qələbəyə çox tez inandı və bunun əvəzini ödədi. Aolu bir dəqiqə aralığında iki qol vurdu.

“Klermon”un qonağı olan “Lans” rəqibə heç bir şans vermədi. “Qan-qızılılar”, daha dəqiqi, Openda 30-34-cü dəqiqələr aralığında üç dəfə fərqləndi. Bu het-trik oyunun taleyini həll etdi. “Lans” 2-ci hissədə artıq hesaba uyğun oynadı. 74-cü dəqiqədə meydana çıxan Klod-Morisə qol vurmaq üçün iki dəqiqə bəs etdi. Xalını 54-ə çatdıran “Lans” artıq 3-cü pillədədi.

Ona görə ki, “Monako” evdə “Reyms”ə uduzdu. Yeganə qolu 51-ci dəqiqədə çempionatın bombardirlərindən Baloqun vurdu. “Reyms” çempionatdakı məğlubiyyətsiz oyunlar seriyasını 19-a çatdırdı.

“Oser”in qonağı olan “Renn” qolsuz heç-heçə ilə kifayətləndi ki, bunu qanunauyğun nəticə saymaq mümkündü. “Lill” – “Lion” oyununda 6 qol vuruldu, özü də hamısı 2-ci hissədə! 46-cı dəqiqədə hesabı açan Devid saatın tamamında penaltidən 2-ci qolu da vurdu. Barkola 64-cü dəqiqədə intriqanı bərpa etsə də, kanadalı hücumçu sona 11 dəqiqə qalmış daha bir penaltini qola çevirdi. Ancaq Lakazett “şirlər”i məğlubiyyətdən qurtardı. 72-ci dəqiqədə meydana çıxan təcrübəli hücumçu 83-cü və 89-cu dəqiqələrdə iki qol vurdu.

“Nant” – “Nitsa” oyunu da heç-heçə bitdi – 2:2. Turun qalan oyunlarına gəlincə, aşkar autsayder “Anje” evdə “Tuluza”ya, “Trua” səfərdə “Loryan”a 0:2 uduzdu. “Monpelye” isə səfərdə “Ayaçço”nun öhdəsindən gəldi.