“Qəbələ”nin oyununu həmişə bəyənmişəm. Komandanın əsas üstünlüyü hücuma çoxlu futbolçu ilə çıxmasıdı. Təəssüf ki, “qırmızı-qaralar” cari mövsümdə yaxşı oyun sərgiləmir. Bu üzdən premyer-liqada sonuncu pillədə qərarlaşıblar. Məyusedici məqaamlardan biri də aşağı sıralardakıların bölgə təmsilçisi olmasıdı. “Turan Tovuz”, “Kəpəz”, “Qəbələ”... Biz həmişə region klublarının premyer-liqada çıxış etməsini arzulamışıq. “Qəbələ”nin bu “futbol ili”ndəki oyununu isə bəyənmirəm. Çünki ötən mövsüm sərgilədiyi futbolun 20 faizini belə ortaya qoymur. Səbəblər çoxdu ki, biri də kollektivin yay fasiləsində əsas futbolçularını itirməsidi. Baş məşqçi Elmar Baxşıyevin sərəncamında təcrübəli legionerlər var idi. Bunun sayəsində ötən mövsüm baxımlı çıxış edirdilər. Hətta Konfrans Liqasına da vəsiqə qazandılar. Transfer dönəmində sözügedən futbolçular ayrıldı və klub onların yerini doldura bilmədi. Təcrübəli əcnəbi futbolçuların heyətə cəlb edilməməsi komandanın xeyli zəifləməsinə gətirib çıxardı. 18-ci turdan sonra qış fasiləsi başlayır. Düşünürəm ki, doğru transfer siyasəti aparan klubların premyer-liqada qalmaq şansı yüksəkdi. Şəxsən “Qəbələ”də bu potensial mövcuddu. 9-cu sırada qərarlaşan “Kəpəz”ə gəlincə, Adil Şükürov baş məşqçi təyin ediləndən sonra Gəncə təmsilçisinin oyun tərzində inkişaf hiss olunur. Son 2 qarşılaşmada 4 xal qazanıblar (“Qəbələ” – 3:0, “Sumqayıt” – 1:1 – red.) Buna baxmayaraq, “Qəbələ”nin özünə gəlib premyer-liqada qalacağına inanıram. Açığı, bölgə təmsilçilərinin yüksək liqada qalmaq üçün bir-biriylə mübarizə aparması mənə pis təsir edir. Ümid edirəm ki, hər üçü qış fasiləsində keyfiyyətli futbolçularla heyəti gücləndirəcək, elitada qalmağı bacaracaq”.