“Bu barədə danışmaq mənim üçün çətindi. Böhrandan çıxara biləcək və ya bilməyəcək demək, bunun içində olmayan biri kimi kənardan bu haqda fikir bildirmək asan deyil. Böhrandan çıxmağın bir sıra yolları var. Bunlardan biri də klubun maliyyə durumudu. Çünki əlavə oyunçular olmalıdı, klub yenilərini cəlb etməlidi. Buna nə qədər imkanları çatacaq - bilmirəm. Mövsümün sonuna qədər transfer edə bilməyəcəklər. Son oyun barədə isə onu deyə bilərəm ki, ilk hissədə və qırmızı vərəqə alana qədər pis görünmədilər. Elmar Baxşıyevin vaxtında da hansı rəqiblə oynamasından asılı olmayaraq, heç biri “Qəbələ”ni tam üstələyə bilməmişdi. Sadəcə, “qırmızı-qaralar”ın məğlubiyyətlərinin əsas səbəbi müəyyən mövqelərdə çatışmazlıqla bağlıdı. Biri mərkəz müdafiəçisi, digəri də qapıçı olmaqla, əsasən iki mövqedə komanda çox axsayır. Təbii ki, hücumçu problemləri də var. Hansı ki, həmişə lazım olan qolları vura bilmirlər. Ona görə də bu iki mövqeyin hesabına həddindən artıq qollar buraxırdılar. Doğrudu, dominant və riskli oynayırdılar, qol vəziyyətləri yaradırdılar, öndə çıxış edirdilər, amma sadə səhvlərdən dolayı da qapılarında qol görürdülər. İndi isə “Qəbələ” bir az daha ehtiyatlı oyun nümayiş etdirir. Ən azı bir oyuna baxıb, nəticəyə gəlmək olar ki, Sxadadze komandaya sistem, bəlli bir struktur gətirməyə çalışıb. Bu gediş mövsümün sonuna qədər nə dərəcədə xeyir verəcək, bunu demək çətindi. İndi hər şey təkcə “Qəbələ”nin əlində deyil. Sözsüz, müəyyən dəyişikliklər olacaq. Ola bilər ki, komandada mübarizlik bir balaca artsın. Ki, mövsümün sonuna yaxın yeni müqavilə üçün hər kəs, xüsusən də legionerlər özünü göstərməyə çalışacaq. Amma bu yetərli olacaqmı? Buna cavab vermək mənə çətindi. Digər tərəfdən də, hansısa oyun üslubunu ortaya qoymaqdan ötrü müəyyən vaxt lazımdı. Bu da bir-iki günün və ya bir-iki ayın içində olası şey deyil. Sxadadzenin mövsümün sonuna kimi vaxtı var. Həqiqətən də vaxt hədsiz azdı. Bu zaman kəsiyində vəzifənin öhdəsindən gələ biləcəyi çox çətin görünür. Bəlkə də öhdəsindən gələ bildi. Fəqət Sxadadzenin taktiki savadına heç birimiz şübhə etmirik. Yetərincə Azərbaycan təcrübəsi var. “İnter”də nümayiş etdirdiyi oyunu görmüşük. Ən azı bunu tam əminliklə deyə bilərik. Çünki tanımadığımız bir sima deyil. Sadəcə, indiki şəraitdə düşdüyü vəziyyət tam fərqlidi. Ən azı Sxadadzenin bu durumdan necə çıxacağı mənim üçün də maraqlı olacaq”.