“Dünənki dəstəyimizdən çox razı qaldım. 11-ci sektoru böyük ölçüdə doldurmuşduq. Tribunada azı 650 azarkeşlə təmsil olunurduq. Monqolustanla matçdakı dəstəyimizdən necə narazı qalmışdıqsa, dünən tam əksi oldu. İnkişaf istəyiriksə, daim əskiklər üzərində işləməliyik. Əsasən də hesab 0:1 olandan sonra yığmaya verdiyimiz dəstək çox möhtəşəm idi. Hesabda geri düşməyimizə baxmayaraq, millimizi daim irəli səslədik və hesab 0:1 olandan sonra dəstəyi daha da artırdıq ki, uşaqların özünəinamı yerinə gəlsin. İnanırıq ki, futbolçularımız da onlara güvəndiyimizi görərək hücuma daha güclü şəkildə atıldılar və bizim dəstəyimizi də arxalarına alaraq bərabərlik qolunu vurdular. Bir azarkeş qrupunun gücü əsasən komanda geri düşəndə bəlli olur. Yoxsa daim qələbə qazanan komandanı hər kəs dəstəkləyər. Bizim dəstəklədiyimiz son üç oyunda komandamız hələ ki evdə məğlub olmayıb. Ümid edirik ki, bu seriya belə də davam edər. Hamımız dünənki çətin matçda sona qədər dəstək olduğumuz üçün çox yorğunuq. U-21 matçına gəlincə, “Azərsun Arena”nın çox əlverişsiz yerdə olduğunu nəzərə alaraq, orda iştirak etməyəcəyik. 3 gün ara ilə iki matçda iştirak etdik. Bütün üzvlərimiz yorğundu. Çoxunun səsi batıb. Bu üzdən bu matçda iştirak edə bilməyəcəyik”.