“Siz yatın, Azərbaycan isə yatmadı" – Ukraynadan Emil Mustafayevlə bağlı qəribə reaksiya
Yığmanın martın 18-dən 25-dək keçirəcəyi təlim-məşq toplanışına dəvət alanlar sırasında yeni adların olduğundan xəbərdarsız. Bunlardan biri də Emil Mustafayevdi.
Bilindiyi kimi, "Futbol+" bu istedadlı futbolçunu yığmamıza cəlb etməyin vacibliyi ilə bağlı dəfələrlə yazıb. Nəhayət, yığmanın müvəqqəti baş məşqçisi Arif Əsədov səsimizi eşitdi...
Xatırlayırsızsa, Emil ötən ilin dekabrında Ukrayna mətbuatına belə demişdi:
"Mən Azərbaycan millisində oynamaq arzusundaydım, çünki atam bunu çox istəyirdi. Ruslan Rotan məni Ukraynanın gənclərdən ibarət komandasına dəvət edəndə artıq seçimimi etmişdim. Həmin vaxt bir komandadan digərinə keçmək düzgün olmazdı. Amma Ukraynanın əsas yığmasından dəvət alsam, cavabım müsbət olar. Çünki bu cür dəvət min ildə bir dəfə ola bilər. Mən burda böyümüşəm və şəxsiyyət kimi formalaşmışam".
Bundan sonra düşünmək olardı ki, Emil artıq seçimini Azərbaycandan yox, doğulub boya-başa çatdığı Ukraynadan yana edib. Lakin o, indi yığmamızın heyətində məşqlərə qoşulub. Qismət olsa, meydana çıxıb debüt də edəcək. Maraqlıdı ki, bu məqam bizi sevindirdiyi qədər Ukraynadan olan həmkarımızı təəssüfləndirib. "Football24.ua" nəşrinin əməkdaşı Andrey Buleça Emilin Azərbaycan millisinə dəvət edilməsini belə şərh edib:
"Ukrayna futbolu diqqətsizlik üzündən yenidən səhvə yol verdi. Təəssüf ki, daha bir perspektivli oyunçunu itirdik. Söhbət Azərbaycan millisinə dəvət alan Emil Mustafayevdən gedir. O, artıq ölkəsinin dəvətini qəbul edib... Birvaxtlar Ruslan Rotan 22 yaşlı yarımmüdafiəçini gənclərdən ibarət komandasına çağırmışdı. Amma Emil öz ölkəsinə yollanmış və orda üç oyun keçirmişdi (2021-ci ilin noyabrında - red). Yadınıza salım ki, sözügedən oyunçu milli səviyyəsində seçimini dəyişməyə hazır olduğunu demişdi. Ancaq Ukrayna ona dəvət göndərmədi. Siz yatın, Azərbaycan isə yatmadı".
Xatırladaq ki, Emil Mustafayev "Polesye"də çıxış edir. Cari mövsümdə 13 oyunda meydan çıxan yarımmüdafiəçi 1 qol, 2 məhsuldar ötürmə ilə yadda qalıb.
KƏNAN BAHADIR
Digər xəbərlər
