“Hakim kimi özümə də maraqlı gəldi ki, belə oyunun ruhunu anlamamaq nə dərəcədə hakimliyə xas olan bir əlamətdi. İmkan olsaydı, bolqarıstanlı hakimlə üzbəüz müəyyən fikir mübadiləsi aparardım. Çünki 50-55-ci dəqiqəyə qədər oyunun ruhunu hiss edə bilməmək nə deməkdi? Söhbət Elvin Cəfərquliyevin 2-ci sarı vərəqə almasından gedirsə, bəli, bu qərarla tam razılaşmaq olar. Amma 1-ci sarı vərəqə özümə də qaranlıq qaldı. Axı sarı vərəqəni hansı qayda pozuntusuna görə verdi? Həmçinin bilmədim, bəlkə də oyunun gərginliyi və dramatikliyi psixoloji cəhətdən hakimlər briqadasına sirayət etmişdi. Bu gərginliyi hakim nə dərəcədə hiss edirdi? Axı matçın axarını, ilk yarını götürəndə “Qarabağ”ın tam üstünlüyü şəraitində keçirdi və normal oyun gedirdi. Komandaların qarşılıqlı münasibəti də gərginlik yaradacaq səviyyədə deyildi. Meydanda kobudluq yox idi, futbolçular qaydalar çərçivəsində, çox səliqəli oynayırdılar. Oyunun gərginliyinin, dramatikliyinin gətirilib bu həddə çatdırlmasında baş hakimin “əməyi” də qiymətləndirilməlidi. Yaxşı ki, sonda ədalət yerini tutdu. Sözün əsl mənasında güclü qalib oldui. Hakimlərin, əsasən də baş hakimin psixoloji durumu məni narahat etdi. Mən də oyuna stadiondan baxırdım. Oyunun axarını, ritmini, nəbzini tutmaq, ab-havasını hiss etmək lazım idi. Fikrimcə, meydanda hakim ən obyektiv şəxs olmalıdı. Baxmayaraq ki, milyonlarla şəxs televiziyadan və minlərlə şəxs stadiondan canlı izləyir. Hakimlər nə qədər bitərəf, obyektiv olsa, bir o qədər həm stadionda olan azarkeşlər, həm də televiziya tamaşaçıları tərəfindən müsbət qiymətləndiriləcək. Ona görə ki, həm reytinq, həm də büdcə baxımından zəif komanda öz gücü hesabına ilk oyunda qalib gəlibsə, cavab görüşündə ona problem yaratmaq lazım deyil. Obyektivlik baxımından tam bitərəf qalmaq lazım idi. “Qarabağ”ın qapısına təyin olunan penalti epizoduna gəlincə, doğrusu, görmədim. Görüb veribsə, lap yaxşı. Çalışırdı ki, bütün epizodlara yaxından baxsın. Amma epizoda yaxın olmaq hakimin hələ düzgün qərar verməsi deyil. Baş hakim müəyyən hərəkətlərdə, futbolçularla davranışda çalışırdı. Amma yenə də kənardan özünə qarşı mənfi, neqativ bir hal yaradırdı. Bayaq dediyim kimi, qarşılaşmanın bu yerə gəlib çatmasında baş hakimin böyük rolu oldu. Yəqin özü də oyuna təkrar baxsa, bunu görər. Fikrimcə, bu hakimin işinə elə də yüksək qiymət verilməyəcək. Müəyyən hərəkətlər var idi, hansı ki, bu dərəcəyə gətirib çıxarmaq lazım deyildi. Ümumən hakimin psixoloji gərginliyi aşkar hiss olundu. Yenə deyirəm, imkanım olsaydı, baş hakimlə üzbəüz oturub, ona 1-2 sual verərdim. Ki, nəyə görə oyunu bu həddə gətirdi? Başda Qurban Qurbanov olmaqla “Qarabağ”a qarşıdakı oyunlarda uğurlar arzulayıram”.