“Doğrudan da, Benua Bastyen yaxşı idarəçilik apardı. Belə də etmək lazımdı. Oyunun ruhuna, ab-havasına uyğun, oyunda gedən cərəyanları hiss etməklə görüşü tamamlamalıdı. Hakimin oyuna hazırlığının yüksək səviyyədə olması hiss olundu. O, matçın ruhunu, stadionda olan mühiti hiss etmişdi. İnanın ki, hər hakim oyunlara belə yanaşsa, idarə etdiyi matçlarda ciddi səhvə yol verilməz. Dünən də mən bunu hiss etdim. Baş hakim epizodlara çox yaxın idi. Fiziki baxımdan da qarşılaşmaya hazır olduğu bilinirdi. Psixoloji cəhətdən də yaxşı görünürdü. Ümumən baş hakim oyunun ruhunu, nəbzini tutmuşdu. Qısası, idarəçilik gözəçarpan dərəcədə yaxşı idi. Kənardan izləyən insanlara da xoş oldu ki, hakim epizodlara yaxın və qərar verərkən qətiyyətlidi, üstünlük prinsipindən yerində yararlanır. Səhv etmirəmsə, cəmi bir sarı vərəqə göstərdi. O da tam qaydalar çərçivəsindəydi. Çünki Juninyo bilmədən kobudluq etdi və hakim də düzgün olaraq qayda pozuntusuna yola verən oyunçunu yerindəcə sarı vərəqəylə cəzalandırdı. Qarşılaşmanı düzgün, öz səviyyəsinə uyğun şəkildə idarə etdiyinə görə Benua Bastyeni təbrik edirəm. “Qarabağ”a da cavab matçında uğurlar arzulayıram”.