Dünən futbol üzrə ölkə çempionatının 1-ci liqasında 18-ci tura start verildi.

İlk oyunda liderliyə iddialı komandalar üz-üzə gəldi. Yəni “Şamaxı” “doğma divarlar” arasında “Qaradağ Lökbatan”la qarşılaşdı. Oyun tərəflərin qarşılıqlı hücum cəhdləriylə başladı ki, hesabı qonaqlar açdı. Ardından qollar sıralandı. Meydan sahibləri rəqibin hesabda önə keçməsinə şərait yaratsa da, sonda bərabərliyə nail ola bildi. Daha doğrusu, “şirlər” sona 8 dəqiqə qalmış məğlubiyyətdən qurtuldu. Belədə Ramiz Məmmədovun yetirmələriylə Azər Həşimovun komandası arasındakı sınaq “sülh”lə nəticələndi. Xal itkisi “Qaradağ Lökbatan”ın zirvədə qalmasına mane olmadı. Ən azı 2-ci yeri əldən vermək istəməyən “Şamaxı” isə “İmişli”nin büdrəyəcəyinə ümid edirdi. Lakin Əsgər Abdullayevin komandası buna imkan vermədi. “İmişli” meydan sahibi olduğu matçda “Araz Saatlı”nı böyük hesabla məğlub etdi. Nəticədə “şirlər” üçüncü pilləyə yuvarlandısa, “İmişli” liderin ən yaxın izləyicisinə çevrildi.

Bu gün keçiriləcək oyunlarla tura yekun vurulacaq. İlk matçda “İrəvan” “Zaqatala”nı qəbul edəcək. Nazim Süleymanovun rəhbərlik etdiyi komandanın çətin günləri davam edir. Maliyyə sıxıntıları içində çabalayan Qərbi Azərbaycan təmsilçisi son iki oyunda darmadağın olub. Belə davam etsə, komandanı autsayderlər siyahısına görəcəyimizə şübhə yoxdu. Odu ki, toparlanmaq və çempionata köklənmək vacibdi. “İrəvan”ın rəqibi isə çətin rəqiblərə sürpriz etməyi sevən “Zaqatala”dı. Rüstəm Məmmədovun yetirmələri ciddi eniş yaşayan komandadan xal almağa çalışacaq. Çünki mümkün qələbə onların gələcəkdə “İrəvan”ı qabaqlaması üçün münbit şərait yaradır.

Növbəti görüş MOİK ilə “Difai Ağsu” arasında olacaq. Ordu klubu ilk “dördlük”də qərarlaşsa da, liderdən uzaq düşüb. İndi hədəf 3 xala yiyələnib “Şamaxı”nı ötmək, qarşıdakı turlarda isə “Qaradağ Lökbatan”ı qabaqlamaqdı. Rəqibin autsayder “Difai Ağsu” olması bu işi asanlaşdıra bilər. Lakin nəzərə alaq ki, Elgiz Kərəmlinin komandası ötən həftə “İrəvan”ı məğlub edərək (5:0) mövsümün sensasiyasına imza atıb. Tura “Mingəçevir”in “Karvan”ı qəbul edəcəyi qarşılaşmayla yekun vurulacaq. “Nur şəhəri”nin təmsilçisi turnirin ortabablarındandı. Hələ ki ciddi hədəf uğrunda mübarizə aparmayan komanda 1-ci liqada qalmağı, demək olar ki, təmin edib. İndi onlardan yaxşı oyun və qənaətbəxş nəticə gözlənilir. Qısası, Ədəhim Niftəliyevin komandası doğma meydanda ən azı məğlub olmamağa çalışacaq. Qonaqların məqsədi isə çempion olmaqdı. Yevlaxlılar ötən həftə sözün əsl mənasından mövsümün şokunu yaşadı. “Şirlər”dən 6 cavabsız qol “yeyən” kollektiv özünə gəlməli və iddiasına sarılmalıdı. Əks təqdirdə liderdən xeyli aralanacaq ki, bu da hədəfdən yayınmağa gətirib çıxara bilər.

13 mart
Şamaxı – Qaradağ Lökbatan 2:2
Elşad Tağıyev, 64. Salman Ələsgərov, 82 – Xəlil Bəşirov, 38. Rayan Guibero, 72.

İmişli – Araz Saatlı 4:1
Həsrət İsayev, 1. Həmzə Əliyev, 45+2-öz qapısına. Elnur Cəfərov, 74. İbrahim Əliyev, 77 – Ceyhun Rəcəbli, 56.

14 mart
İrəvan – Zaqatala 3:0
Bəşir Ayralov, 61. Balamirzə Soltanov, 73. Samir Qurbanov, 84.
Bakı, “ASK Arena”. Saat 13.00.

MOİK – Difai Ağsu 3:1
Xəyal Bədirov, 55. Nihad Qurbanlı, 72. Elmir Rəhimzadə, 83 - Bayraməli Qurbanov, 88.
Binə, qəsəbə stadionu. Saat 15.00.

Mingəçevir – Karvan 1:0
Xəyal Muradov, 28.
Mingəçevir, Yaşar Məmmədzadə adına şəhər stadionu. Saat 15.00.

Xal durumu: Qaradağ Lökbatan – 36, MOİK, İmişli – 35, Şamaxı – 34, Karvan – 27, İrəvan – 26, Zaqatala – 19, Mingəçevir – 21, Difai Ağsu – 12, Araz Saatlı – 4.
Bombardirlər: Elşad Tağıyev (Şamaxı) – 12, Elmir Rəhimzadə (MOİK) – 12, Emin Zamanov (Şamaxı) – 9.

KƏNAN BAHADIR