Dünən futbol üzrə ölkə çempionatının 1-ci liqasında 10-cu tura start verildi.

Gün ərzində keçirilən iki oyunda maraqlı nəticələr qeydə alındı. Ev sahiblərinin qələbəsinə şahidlik etdiksə, qonaqlar uğursuz səfər görüşünə imza atdı. Daha dəqiq desək, “İrəvan” Yevlaxdan kor-peşman qayıtdı. Belə ki, “Karvan” çempionluğa iddialı rəqibi iki cavabsız qolla yola saldı. İkinci matçda “Zaqatala” autsayder “Difai Ağsu”nu məğlub etdi. Rüstəm Məmmədovun yetirmələri 6 qolun vurulduğu matçdan 4:2 hesablı qələbə ilə ayrıldı. Yəni ağsulular bu dəfə də mövsümdə ilk 3 xalına qovuşa bilmədi.

"Football-plus.az" xəbər verir ki, tura bu gün keçiriləcək üç oyunla yekun vurulacaq. “Mingəçevir”i çətin “Qaradağ Lökbatan” sınağı gözləyir. Bakılılar ev oyununda qələbəyə köklənib. Qonaqlar üçün də ümid var, lakin Azər Həşimovun komandası MOİK-lə liderlik uğrunda mübarizədə geri düşməməlidi. İkinci görüşdə “Araz Saatlı” “Şamaxı”nı evdə məğlub etməyə çalışacaq. Çünki meydan sahiblərinin turnir vəziyyəti ürəkaçan deyil. “Şirlər” səfərə yeni baş məşqçi Ramiz Məmmədovun rəhbərliyi altında yollanacaq. Onun vəzifəsi komandanı çempion etməkdi. Bunu nəzərə alsaq, “şirlər” özünü qonaq kimi aparmamağa, rəqibdən 3 xal qoparmağa məcburdu. Tura “İmişli” – MOİK matçıyla yekun vurulacaq. Əsgər Abdullayevin komandası bir ara parlasa da, indi solğun görünür. Təcrübəli mütəxəssisin yetirmələri “doğma divarlar” arasında sona qədər döyüşməlidi. Bunu bacara bilib-bilməyəcəkləri isə böyük sual altındadı. Çünki rəqib liderdi, ordu klubudu. Qəzənfər Abbasovun yetirmələrinə “gözün üstə qaşın var” deyən yoxdu. Yəni MOİK mövsüm başlayandan məğlub olmayıb. “İmişli” bu məqamı nəzərə almalıdı.

6 dekabr
Karvan – İrəvan 2:0
Müşfiq Teymurov, 50. Peter Kinqs, 90+6.

Zaqatala – Difai Ağsu 4:2
Roini İsmayılov, 51. Kənan Müslümov, 90. Nizami Səmədov, 90+4. Kamil Hüseynov, 90+6-öz qapısına – İlham Allahverdiyev, 18. Rəhman Quliyev, 47.

Qaradağ Lökbatan – Mingəçevir 3:0
Urfan İsmayılov, 61, 90+2. Xəlil Bəşirov, 77.
7 dekabr. Bakı. “Neftçi” Futbol Mərkəzinin 4-cü meydançası. Saat 13.00.

Araz Saatlı – Şamaxı 0:1
Elşad Tağıyev, 59-p.
7 dekabr. Saatlı, Olimpiya İdman Kompleksinin stadionu. Saat 14.00.

İmişli – MOİK 2:1
Həzrət İsayev, 23. Silva Gilyerme, 51. - İsa Zeynallı, 44-p.
7 dekabr. İmişli, Heydər Əliyev adına şəhər stadionu. Saat 14.00.

Xal durumu: Qaradağ Lökbatan - 21, MOİK – 19, Karvan, Şamaxı, İmişli – 18, İrəvan – 17, Zaqatala – 13, Mingəçevir – 10, Araz Saatlı – 3, Difai Ağsu – 1.
Bombardirlər: Elşad Tağıyev (Şamaxı) – 10, Emin Zamanov (Şamaxı) – 6, Peter Kinqs (Karvan) – 7.