“Bu haqda danışarkən demişdim ki, “Qarabağ” üçüncü dövrə bitənə kimi çempionluğu təmin edəcək. Hadisələrin indiki axarı da bunun reallaşacağını göstərir. Bu da yaxşı hal deyil. Ona görə ki, 2-3-cü yerdə olan komandalar “Qarabağ”dan çox geridədi. Bu nəticə “köhlən atlar”la ayaqlaşa bilən komandanın olmadığını göstərir. Hesab edirəm ki, çempionatın durumunun belə olması Ağdam təmsilçisinin özünə də ziyandı. Çünki rəqabət üst səviyyədə olmadıqda futbolçuların da performansı aşağı düşür. Ona görə də rəqabət lazımdı. Nə qədər güclü rəqabət olarsa, bir o qədər də çempionatımız inkişaf edər. Düşünürəm ki, maliyyə cəhətdən “Qarabağ”dan geri qalmayan klublarımız da var. Onlar premyer-liqaya rəng qatmaq haqda düşünməlidi. Ki, “Qarabağ”la rəqabət apara biləcək səviyyəyə çatsınlar.

Doğrudu, “Qarabağ” həm də Avropa Liqasında yaxşı çıxış edir. Çempionat və avrokubok oyunlarını müqayisə etsək, çox böyük fərq var. Qurban Qurbanovun komandası orda üst səviyyədə performans nümayiş etdirir. 3-4 güclü klubumuz da olsaydı, “Qarabağ”da da güclənmə prosesi çox sürətlə gedərdi. Rəqabət olmayan yerdə istər-istəməz futbolçularda da geriləmə olur. Biz futbol oynadığımız dövrdə də belə idi. Yəni qarşınızda rəqabət görmürsüzsə, istər-istəməz geriləyirsiz. “Qarabağ”a Avropa Lqasında uğurlar diləyək. Gördüyünüz kimi, çempionatda da onlara rəqib yoxdu. Amma rəqibin olması vacibdi”.