“Hər şeydən öncə “Qarabağ”ın iki heyətinin olmasını qeyd etmək lazımdı. Həm Avropa təcrübəsi, həm də uzunmüddətli heyət və məşqçilər korpusunun olması “Qarabağ”ın uğurunda böyük rol oynayır. 10 ildən çoxdu komandanın məşqçilər korpusu, strategiyası dəyişmir və gündən-günə inkişaf edir. Daxili çempionatın da qrafikini əla bilirlər və ona uyğun hərəkət edirlər. O biri komandalara gəlincə, onlar üçün çox çətin olacaq. Niyə? Çünki tez-tez məşqçi dəyişikliyinə əl atılır, korpus dəyişir, rəhbərlik dəyişir, strategiya dəyişir. Yəni bu məsələ bir-iki illə olmur. İmkan yaradılmalıdı ki, məşqçi korpusu 2-3 il işləsin, öz fəlsəfəsini yeridə, komandanı tam formalaşdıra bilsin. “Qarabağ”la başqa komandalar arasında olan əsas fərq budu. Digər bir məsələ maliyyə sisteminin düzgün tənzimlənməsidi. Ağdam təmsilçisi kluba transfer etdiyi futbolçuları doğru təhlil edir və komandaya uyğun olub-olmadığını dəqiqləşdirdikdən sonra onlara şans verir. Doğrudu, çempionatın əvvəlində “Zirə” turnir cədvəlinə başçılıq edirdi. Amma o zaman belə məndən soruşsaydılar, yenə də böyük ehtimalla “Qarabağ”ın çempion olacağını deyərdim. Çünki çempionatın əvvəlində həmişə müəyyən enişlər olur. O da ki Çempionlar Liqasıyla, Avropa Liqasıyla bağlı olan məsələdi. “Qarabağ” iki eyni heyətə malik olan, 25 futbolçudan ibarət komandadı. Ona görə də bütün komponentlərdə rəqiblərindən açıq-aşkar üstündü. Bu il çempionluq “köhlən atlar” üçün daha asan olacaq. Lakin qalan doqquz komanda arasında güclü rəqabət gedəcək”.