Turlar irəlilədikcə “Bavariya”nın çempionluq şansı göz önündə əriyir.

Çünki komanda qələbə qazanıb “Bayer-04”ün xal itirməsinə ümid bəsləmək əvəzinə, əksinə, özü xalları sağa-sola paylayır. Münhen nəhəngi “Frayburq” səfərində erkən qol buraxıb hesabda geri düşməsinə rəğmən, vəziyyəti öz xeyrinə dəyişə bildi. Amma sonluq istənilən kimi alınmadı. Meydan sahibləri sona 3 dəqiqə qalmış məğlubiyyətdən qurtuldular. Son 4 turda 3-cü dəfə xal itirən “rekordmayster” artıq özü da başa düşür ki, bundan sonra çətin ki, ötənilki kimi möcüzə baş versin...

Şənbə gününün qarşılaşmaları qonaqların böyük üstünlüyü ilə keçdi. Ötən tur sürpriz şəkildə evdə “Hoffenhaym”a boyun əyən Dortmund “Borussiya”sı bu dəfə paytaxtdan inamlı qələbə ilə dönməklə “Union”un bundesliqada evdəki 6 oyunluq məğlubiyyətsiz seriyasına son qoydu. “Arılar” çempionat çərçivəsində təqvim ilinin ilk 5 səfər oyununda cəmi 1 qol buraxmaqla şəxsi rekordu yenilədilər. Bu əsrdə daha öncə bunu yalnız “Bavariya” (2013) və “Leyptsiq” (2019) bacarmışdı. “Leyptsiq” hesabda geri düşdüyü oyunda səfərdə “Bohum”u darmadağın etməklə “Real” ilə oyun ərəfəsində yaxşı formada olduğunu göstərdi. Münhenqladbax “Borussiya”sı Mayntsdan xalla dönməklə səfərdəki 2 oyunluq məğlubiyyət seriyasına son qoydusa, “Auqsburq” autsayder “Darmştadt”la səfər oyununda ilk 29 dəqiqəyə 5 qol sığışdırmaqla əsl şou göstərdi! Bundesliqa tarixində yalnız iki komanda - 2021-də “Frayburq” (Münhenqladbax “Borussiya”sına qarşı) və 1984-də Münhenqladbax “Borussiya”sı (Braunşveyq “Ayntraxt”ına qarşı) 5 qolu daha az müddətə (hər ikisi ilk 25 dəqiqəyə) sığışdırıb. Tarixinin ən uğurlu mövsümünü keçirən “Ştutqart” “Volfsburq”la səfər oyununda hesabına növbəti qələbəni yazdı. Şvabiyalıların “Bavariya”dan artıq cəmi 4 xal geridə olması diqqəti çəkir.

Tura bazar günü keçirilən iki oyunla yekun vuruldu. Əla formada olan Bayerin qolları ilə “Verder”i üstələyən “Hoffenhaym” bu tur evdə qələbə qazanan yeganə komanda oldu. Həmin gün əsas diqqətlər “Reyn Enerji”yə yönəlmişdi. Heç də yaxşı mövsüm keçirməyən və elitada qalmaq uğrunda çarpışan “Köln”, gözlənildiyi kimi, lider “Bayer-04”ə layiqincə müqavimət göstərə bilmədi. “Keçilər” bəlkə də tam heyətlə oynasaydılar, nəyəsə ümid etmək olardı. Amma Tilmannın artıq 14-cü dəqiqədə qırmızı vərəqə almasından sonra hər şey bəlli oldu. Cinah müdafiəçilərinin qolları ilə hesabına növbəti 3 xalı yazan Xabi Alonsonun komandası “Bavariya” ilə xal fərqini 10-a çatdırdı. “Opta”nın versiyasına görə komandanın çempionluq şansı artıq 95 faizə bərabərdi! Rəsmi matçlarda məğlubiyyətsiz seriyanı 34 oyuna çatdıran “aspirinlər” 24-cü turu da uduzmadan başa vurmaqla şəxsi rekordu təkrarladılar. Komanda daha öncə yalnız 2009/10-da ilk 24 turu məğlubiyyətsiz başa vurmuşdu. Maraqlıdı ki, həmin vaxt “Bayer-04” məhz 25-ci turdan etibarən “tökülməyə” başlamış və mövsümü yalnız 4-cü pillədə tamamlamışdı. Bundan başqa, komanda səfərdə ardıcıl 17-ci rəsmi oyunda qol vurmaqla da şəxsi rekordunu təkrarladı. “Bayer-04” daha öncə bunu yalnız 2016-da bacarmışdı.

24-cü tur
Frayburq – Bavariya 2:2
Günter, 12. Höler, 87 – Tel, 35. Musiala, 75. (34700)
Frayburq: Atubolu, Sildilliya, Ginter, Qulde, Günter, Eqqeştayn (Filipp, 85), Höfler, Doan (Vaysshaupt, 77), Şallai (Qreqoritş, 77), Qrifo (Röl, 64), Höler.
Bavariya: Noyer, Kimmix (Laymer, 64), Dayer, Kim Min Çje, Gerreyro (Devis, 64), Pavloviç, Qoretska, Müller (Çupo-Motinq, 76), Musiala (Upamekano, 83), Tel, Keyn.
Köln – Bayer-04 0:2
Frimponq, 37. Qrimaldo, 73. (50000)
Bayer-04: Qradetski, Frimponq (Tella, 46), Stanişiç, Ta, İnkapye (Tapsoba, 79), Qrimaldo, Andrix, Caka (Palasios, 82), Virts, Hofmann (Adli, 65), Şik (İqlesias, 65).
Union – Borussiya D 0:2
Adeyemi, 41. Maatsen, 90. (22012)
Borussiya: Mayer, Ryuyerson, Zyule, Şlotterbek, Maatsen, Zabitser, Əmrə Can, Sanço (Bensebayni, 88), Brandt (Salih Özcan, 66), Adeyemi (Bayno-Gittens, 78), Füllkruq.
Bohum – Leyptsiq 1:4
Vittek, 7 – Olmo, 30. Openda, 68. Ordets, 71-öz qapısına. Poulsen, 72. (24200)
Leyptsiq: Qulaçi, Henrixs (Simakan, 78), Orban, Lukeba, Raum, Aydara, Zayvald, Olmo (Elmas, 65), Simons (Bitşiabu, 88), Baumqartner (Poulsen, 65), Openda (Şeşko, 65).
Volfsburq – Ştutqart 2:3
Mehle, 50. L.Nmeça, 83 – Girassi, 14; 54-p. Vaqnoman, 77. (28917)
Ştutqart: Nübel, Vaqnoman, Ruo, Anton, İto, Mittelştadt (Mvumpa, 87), Karazor, Ştiller (Mahmud Dahud, 90+7), Miyo (Dəniz Undav, 72), Fürix (Levelinq, 72), Girassi (Çon Vu Yon, 87).
Haydenhaym – Ayntraxt F 1:2
Piringer, 59 – Gimber, 39-öz qapısına. Nkunku, 49. (15000)
Hoffenhaym – Verder 2:1
Bayer, 8; 44 – Alvero, 90+2. (25000)
Maynts-05 – Borussiya M 1:1
Burkardt, 12 – Nqumu, 55. (33305)
Darmştadt – Auqsburq 0:6
Tits, 2; 84. Yensen, 12. Demiroviç, 20; 29. Varqas, 25. (17810)
1. Bayer-04 24 20 4 0 61-16 64
2. Bavariya 24 17 3 4 65-28 54
3. Ştutqart 24 16 2 6 55-31 50
4. Borussiya D 24 12 8 4 48-30 44
5. Leyptsiq 24 13 4 7 53-31 43
6. Ayntraxt F 24 9 10 5 38-31 37
7. Hoffenhaym 24 9 6 9 43-44 33
8. Verder 24 8 6 10 33-37 30
9. Frayburq 24 8 6 10 32-44 30
10. Auqsburq 24 7 8 9 39-41 29
11. Haydenhaym 24 7 7 10 34-42 28
12. Borussiya M 24 6 8 10 42-46 26
13. Volfsburq 24 6 7 11 30-39 25
14. Union 24 7 4 13 23-39 25
15. Bohum 24 5 10 9 29-50 25
16. Köln 24 3 8 13 16-39 17
17. Maynts-05 24 2 10 12 19-38 16
18. Darmştadt 24 2 7 15 24-58 13
Bombardirlər: Keyn (Bavariya) – 27, Girassi (Ştutqart) – 20, Openda (Leyptsiq) – 17, Dəniz Undav (Ştutqart), Demiroviç (Auqsburq) – 14.
Növbəti turun oyunları martın 8-10-u aralığında keçiriləcək: Verder – Borussiya D, Ştutqart – Union, Bohum – Frayburq, Bayer-04 – Volfsburq, Bavariya – Maynts-05, Leyptsiq – Darmştadt, Ayntraxt F – Hoffenhaym, Borussiya M – Köln, Auqsburq – Haydenhaym.

Turun rəqəmi
50 – Xabi Alonso baş məşqçi qismində bundesliqada 50-ci oyununu keçirdi və 33-cü qələbəyə sevindi (10 heç-heçə, 7 məğlubiyyət). Bu, turnirin tarixində 3-cü ən yaxşı göstəricidi. İlk 50 oyunda yalnız “Bavariya”nın məşqçiləri – Hans-Diter Flik (40) və Xosep Qvardiola (42) Alonsodan daha çox qələbə qazanıb.

Turun ulduzu
Seru Girassi (Ştutqart) – fransızəsilli qvineyalı forvard mükəmməl mövsüm keçirməkdə, komandasını çiynində daşımaqda və rekordları alt-üst etməkdədi. 27 yaşlı forvard çətin “Volfsburq” səfərində biri penaltidən olmaqla 2 qol vurdu və şvabiyalıların qələbəsində mühüm rol oynadı. 24 oyuna 50 xal “Ştutqart”ın bundesliqada yeni rekordudu. Eyni zamanda indiyə qədər bu klubun heyətində heç bir futbolçu mövsümün ilk 24 turunda 20 qol vurmamışdı!

Turun sitatı
Xabi Alonso, “Bayer-04”ün baş məşqçisi: