Tur “Köln”ün “Herta”nı darmadağın etməsi ilə start götürdü.

“Football-plus.az” xəbər verir ki, heyətinin potensialına görə bəlkə də avrokuboklar uğrunda mübarizə aparmağa qadir olan berlinlilər “əmin addımlarla” 2-ci bundesliqaya yollanırlar. Son 10 turda 7-ci dəfə uduzan və sona 2 tur qalmış sonuncu pillədə qərarlaşan bu komandanın bundan sonra xilas olması artıq möcüzə sayılacaq.
Çempionluğa namizədlər – “Bavariya” ilə Dortmund “Borussiya”sı ardıcıl 2-ci turu itkisiz başa vurdu. Münhen nəhəngi sevimli rəqiblərindən olan “Şalke-04”ü yenə “kötəklədi”. “Rekordmayster” helzenkirhenliləri ardıcıl 10-cu bundesliqa matçında məğlub etdi. Son 6 dueldə isə top fərqi 28:0-dı! “Bavariya”ya qol vuran “Şalke-04”ün son futbolçusu 2019-un fevralında türkiyəli forvard Ahmed Kutucu olub. “Borussiya”ların duelində isə təbii ki, sevinən Dortmund təmsilçisi oldu. Münhenqladbax klubu indi “Siqnal İduna Park”dan xalla dönəcək səviyyədə deyil. “Arılar” ilk 32 dəqiqədə 4 top vurmaqla 2-ci hissəni formallığa çevirdilər. “Bavariya”nı qarabaqara izləməkdə davam edən “Borussiya” fanatlarını növbəti parlaq qələbə ilə sevindirdi. Yeri gəlmişkən, “Borussiya” 2023-də “böyük beşlik”də çempionat oyunlarında ən çox (53) qol vuran komandadı. İkinci yerdə “Mançester Siti” (48) qərarlaşıb. “Arılar” intriqanı son tura daşımaq üçün növbəti turda büdrəməməlidi. Özü də komandanı səfərdə Bavariya təmsilçisi “Auqsburq”la oyun gözləyir...

“Leyptsiq” “Verder”lə ev oyununda 87-ci dəqiqəyə qədər geridə olsa da, mükəmməl geridönüşlə hesabına 3 xal yazdı. “Öküzlər”in debütantlara qarşı görüşlərdəki məğlubiyyətsiz seriyası 27 oyuna çatdı! Kəskin enişdə olan “Verder” ardıcıl 10-cu bundesliqa matçında ən azı 2 qol buraxdı. Bu, klubun elitadakı yeni antirekordudu. “Union”la “Frayburq”un dueli faktiki ÇL-ə vəsiqə uğrunda oyun kimi qiymətləndirilirdi. Paytaxt təmsilçisi son 2 turda qola və qələbəyə həsrət qalsa da, ən vacib anda toparlanmağı bacardı. “Union” həm də birdən-birə üç göstəricidə şəxsi rekordunu yenilədi. Komanda bundesliqa çərçivəsində evdəki məğlubiyyətsiz seriyanı 22 oyuna çatdırdı (14 qələbə, 8 heç-heçə). Bundan başqa, berlinlilər mövsümdə 17-ci qələbəni qazanmaqla və xalını 59-a çatdırmaqla da tarixində ilkə imza atdıl. “Maynts-05”i darmadağın edən “Ayntraxt”, nəhayət, 10 oyunluq qələbəsiz seriyaya son qoydu. “Volfsburq” “Bayer-04”ü 6-cə pillədən sıxışdırdısa, “Bohum” sona 2 tur qalmış düşmə zonasını tərk etdi.

Turun rəqəmi
42 – 32-ci tur bundesliqada mövsümün hələ ki ən məhsuldar turu kimi yadda qaldı. 9 qarşılaşmada qapılara 42 qol vuruldu ki, bu da orta hesabla hər oyuna 4,7 qol deməkdi. XXI əsrdə bu turnirdə cəmi 1 dəfə 1 tur ərzində indikindən daha çox qol vurulub. Bu hadisə 2001/02-nin sonuncu – 34-cü turunda baş verib (44 qol).

Turun ulduzu
Şeraldo Bekker (Union) – Surinam yığmasının üzvü “Frayburq”a qarşı turnir cədvəli baxımından olduqca mühüm əhəmiyyət daşıyan qarşılaşmada şou göstərdi. 28 yaşlı hücumçu oyunu 2 qol, 2 məhsuldar ötürmə ilə tamamlayaraq berlinlilərin vurduğu bütün qollarda yaxından iştirak etdi! Buna qədər “Union”un heyətində bundesliqa matçında 4 qolda iştirak edən futbolçu olmamışdı. Elə cari mövsümdə də turnirdə heç kim belə performans sərgiləməmişdi. Bekker “Union”da 4-cü mövsümünü keçirir. Qaradərili futbolçu ilk 3 mövsümdə bundesliqada ümumilikdə 7 qol, 6 məhsuldar ötürməlik fayda vermişdisə, bu mövsüm onun hesabında artıq 11 qol, 6 məhsuldar ötürmə var.

Turun sitatı
Herbert Hayner, “Bavariya”nın prezidenti: