"Bu məsələnin davamlı şəkildə müzakirə olunması özü də müsbət haldı. Deməli, ictimaiyyət, media Sumqayıt stadionunun tribunalarını dolu görmək istəyir. Bunun özü də bir daha Sumqayıtın futbol, azarkeş ənənələrindən xəbər verir. Mən ilk gündən bu məsələyə nikbin yanaşmışam. Sumqayıt futbolunun heç vaxt azarkeş problemi olmayıb. Məhz bu səbəbdən bu gün də insanlar Sumqayıt stadionunun tribunalarını dolu görmək istəyir. Demək olmaz ki, yeni stadiona azarkeş gəlmir. "Neftçi" ilə oyunu qoyaq qırağa. "Turan Tovuz" və "Kəpəz"lə oyunlara 2-3 min arası azarkeş gəlib. İnsanlar protokola aldana bilər, amma orda oyun saatına kimi rəsmi bilet satışının göstəriciləri yazılır. "Kəpəz"lə oyuna 800 nəfər yazılıb. Hansı ki stadionda minimum 2000 azarkeş var idi. Azarkeşlər ilk hissənin yarısına kimik gəlməyə davam edirdi. Şəxsən mən stadiondayım, şəkil də çəkmişdim. Çəkilişdə görünən tribunalarda yan-yana 3 sektor dolu idi. Hər sektorun tutumu 320 nəfərdi. Elə 960 nəfər bu 3 sektor eləyir. İkinci mərtəbədə də 200 nəfərlik bir sektor dolmuşdu. Bu iki göstərici 1000-i keçdi. Hələ mən çəkilişə düşməyən mərkəzi tribunadakı 400-500 azarkeşi demirəm. Bura qapı arxasında qərarlaşan 200 nəfərə yaxın "Sumqayıt"ın rəsmi fanklubunu və onlara yaxın sektorda qərarlaşan müstəqil azarkeşləri, 50-60 nəfərlik "Kəpəz" azarkeşlərini də əlavə etsək, çox rahat şəkildə stadionda 2000 azarkeşin olduğunu deyə bilərik. O ki qaldı niyə daha çox azarkeş gəlməmişdi, bunun obyektiv səbəblərini deyim. İlk növbədə oyun iş gününə təsadüf etdi. Sosial şəbəkədə bununla bağlı bir neşə şərh qarşıma çıxdı ki, cümə günü saat 19.00-da Sumqayıt camaatı Bakıdan işdən qayıdır. Hətta bir nəfər yazmışdı ki, bu dəqiqə Xırdalanda tıxacdayam. Bu bir fakt ki, oyun günü münasib seçilməmişdi. İkinci məsələ biletlərin qiymətinin yüksək olmasıdı. Bizim bəzi klub rəhbərləri başa düşməlidi ki, futbolunun səviyyəsi belə olan ölkələrdə 5-10 manata bilet olmur. Deyə bilərlər ki, orda 2-3 manatlıq biletlər də var idi, amma mən düşünürəm ki, bizim çempionat üçün 2 manat maksimum qiymət olmalıdı. Ən uyğun qiymət 1-2 manatdı. İnsanların maddi durumunu, yaşam tərzini də qoyuram qırağa. Halbuki hər kəsə bəllidir ki, futbolu sevən, futbola daha çox gələn kasıb təbəqədi. Varlı futbola baxmaq istəyəndə təyyarəyə bilet alır və gedir Barselonada, Milanda, Münhendə oyuna baxır. Samir Abasov azarkeşlər haqda xoş olmayan sözlər işlədib. Mən də sual verərdim: "Sumqayıt"ın srağagün ortaya qoyduğu oyun 10 min azarkeşi haqq edir? Hamı "Sumqayıt"ın 2-ci yerdə olduğunu qabardır, amma bizdə hazırda çempionat elə məcrada gedir ki, bu gün 2-ci pillədə olan komanda 2 tur sonra 8-ci pilləyə enə bilər. Yəni bu 2-ci yer o 2-ci yerlərdən deyil. "Zirə" 9 oyun qələbə qazana bilmədi, amma 2-ci pillədən də düşmədi. Üçüncü vacib məqam təbliğat məsələsidi. Gəlin görək istər "Turan Tovuz"la, istərsə də "Kəpəz"lə oyunlardan öncə şəhərin hansı nöqtələrində afişalar vurulmuşdu? 1-2 marşuruta kiçik afişa vurmaqa iş bitmir, bu iş kompleks şəkildə görülməlidi. Şəhərin böyüş yaşayış məhəllələri, mikrorayonları var, hansı ki, təbliğat oralardan başlamalıdı. 17-18 mikrorayonlar, "Şərq bazarı", 9 mikrorayon, "Bağlar" massivi və s. kimi yetərincə çox əhali yaşayan ərazilərdə bir afişa belə yox idi. Sumqayıt Dəmiryol Vağzalından hər gün minlərlə insan istifadə edir, yəni klubdan bir adamın ağlına gəlmir ki, vağzal rəhbərliyi ilə danışıb o əraziyə bir stend vursunlar? Bilirsiz, bunlar hamısı şərtdi".