“Bu məsələ oyun günündən müzakirə olunur, açığı, müzakirənin bu formada getməsi mənə təəccüblü gəlir. Bu proses davamlı olsa, narahatlıq üçün əsas yaranar. Məsələyə obyektiv yöndən yanaşaq, boş tribunalara görə sözün əsl mənasında narahatlıq keçirənləri anlayıram. Ola bilsin, onların əksəriyyəti cavandı, Sumqayıtın futbol ənənəsi, futbol azarkeşləri haqda yetərincə məlumatları yoxdu. Amma bəzi fikirlərə də rast gəldim. Sanki "Neftçi" ilə oyundan sonra baltanı itiləyib hazır dayanıblar ki, baltalasınlar. Həmin şəxslər "Neftçi" ilə oyunda tribunaya gələn azarkeşlərin sifarişlə yığıldığığını yazırdılar. Amma kökündən yalan idi. Şəxsən mənim tanıdığım neçə-neçə insan var idi ki, oyun günü mənə yazıb bilet tapa bilmədiklərini demişdilər. Bəli, etiraf edim ki, "Turan Tovuz"la oyuna gözləniləndən çox az azarkeş gəldi. Bunun da obyektiv səbəblərinin olduğunu düşünürəm. Birincisi, oyun günü hava həddən artıq soyuq idi, hətta mən səhər uşağı stadiona - yarışa aparanda tək-tək qar da atırdı. Adam əlini cibindən çıxara bilmirdi. İkinci səbəb kimi rəqib amilini qeyd edərdim. "Turan Tovuz"un adına, tarixinə böyük hörmətim var, amma "Neftçi" ölkənin köklü klubudu, hələ də brendini, çəkisini qoruyub-saxlayıb, günü bu gün də hansı bölgəyə səfər etsə, "Neftçi" gəlir" ajiotajı ilə azarkeş toplamağı bacaracaq. Üçüncü məqam kimi oyun saatını qeyd edərdim. İstirahət günü olsa da, nəzərə alaq ki, bu gün sadə insanların əksəriyyəti özəl sektorda, günəmuzd əsasda çalışır. O insanlar bazar günü də işlədiyi üçün günorta saatlarında oyunlara gələ bilmirlər. Təbii ki, bilet amili də sözünü deyir. Bildiyim qədəri ilə "Sumqayıt"ın oyunlarına 2-5-10 manatlıq biletlər satılır. Qiymətləri insanlar üçün daha əlçatan etmək lazımdı. Sumqayıt əhalisinin çoxu zəhmətkeş təbəqənin insanlarıdı, hər kəsin maddi durumu o qədər yüksək deyil ki, hər oyuna bilet alsın. Rəmzi məbləğə - 1 manata da satmaq olar. 2-5 manata 3 min bilet satınca 1 manatdan 8 min sat. Bu daha sərfəli olar. İstənilən halda, bu məsələdə ciddi bir probem görmürəm. Sumqayıt futbol şəhəridi, bu şəhərdə həmişə böyük azarkeş kütləsi olub, "Xəzər"dən, "Gənclərbirliyi"ndən indiyə qədər, bu gün də var. Elə "Kapital Bank Arena"da neçə oyun olub ki, yerlər dolduğuna görə adamlar oyunu hasarın arxasından izləyib, çoxunu polis geri qaytarıb, sizin qəzetdə də bu haqda dəfələrlə yazılıb. Düşünürəm ki, "Sumqayıt"ın növbəti ev oyunlarına ən azı 5-6 min azarkeş gələcək”.