"Açılış oyununda stadion tam dolmuşdu. Satışa çıxan bütün biletlər satılıb qurtarmışdı. "Neftçi" ilə oyuna 8100 azarkeş gəlsə də, "Turan-Tovuz"la oyunda biz bunu görə bilmədik. Bilet satışı gözlədiyimiz səviyyədə deyildi. Cəmi 1200 bilet satılmışdı. Bundan sonra həm marketinq departamenti, həm də klub rəhbərliyi olaraq, klubdaxili iclas keçirdik. Stadiona az azarkeş gəlməsinin səbəblərini araşdırmaq istəyirdik. Sosial şəbəkələri yaxından izləyib, mətbuatda işləyən həmkarlarımının, azarkeşlərin bizim paylaşımlarımıza verdiyi reaksiyalara əsasən bir neçə variant səsləndirdik. Bunlardan biri oyunun erkən saatlarda başlaması idi. Bu məsələ üzərində dayandıq. İşıqlandırmada bəzi problemlər var idi. Onu həll etdikdən sonra PFL-ə müraciət etdik və oyunu 19.00-a saldırdıq. İkinci variant hava şəraitinin əlverişsiz olması idi. Düzdü, bu məsələdə əlimizdən heç nə gəlmir. Lakin "Kəpəz"lə oyunda hava yaxşı idi. Digər variant isə biletlərin qiyməti idi. Düşünürük ki, biletlərin qiyməti normaldı. Qiymətlər 2, 3, 5 və 10 manatadı. Sonra fikirləşdik ki, bəlkə də təbliğatı düzgün aparmırıq. Gecikirik və şəhər sakinlərinin ev oyunlarından xəbəri olmur. Ona görə "Turan Tovuz"la matçın fasiləsində monitorda "Kəpəz"lə oyunun afişasını verdik. Sosial şəbəkə hesablarımızda dayanmadan təbliğat apardıq. Şəhərin ən qaynar, gur nöqtələrinə yazılı afişalar yapışdırıb, elektron monitora poster və videoçarx şəklində oyunumuzun anonsunu verdik. Hətta Sumqayıtda hərəkət edən avtobusların şüşələrinə belə afişalar yapışdırdıq. Amma çox təəsüf ki, bunların heç birinin qarşılığını görmədik. Ara-sıra azarkeşlərin yazdıqlarından belə başa düşdük ki, insanların həmişə nəsə bəhanəsi var. Oyun 16.00-da başlayanda yazırdılar ki, çox tezdi, bir az gec olsa, gələrik. Vaxtı dəyişib 19.00 etdik, dedilər gecdi, 16.00 olsaydı, gələrdik. Həftəiçi olanda deyirlər ki, niyə həftəiçi salırsız, iş günüdü. Həftəsonu olanda isə yazırlar ki, insanların o qədər işi var, niyə həftə içinə salmırsız? Lakin biz yenə də araşdırmalarımıza davam edirik. Optimal bir yol tapmağa çalışırıq ki, həm azarkeşlərimiz bizdən razı qalsın, həm də biz onlardan. Hətta stadiona bir azarkeş gəlsə belə, futbolçularımız onun üçün oynayır. “Azarkeşlər gəlmir” deyib şikayət edərkən, gələnlərin əməyini yerə vurmaq fikrimiz də yoxdu. Fanklubumuz uzaq səfər oyunlarında belə, bizi heç vaxt dəstəksiz qoymayıb. Onlara ayrıca təşəkkür edirəm. Ondan əlavə oyunun startından 15 dəqiqə sonraya qədər bilet satışı oldu. Biletləri alan həmin 630 nəfərin hər birinə ayrı-ayrılıqda təşəkkürümü bildirirəm. Gəlməyənlərdən şikayət ediriksə, gələnləri də unutmaq olmaz".