“Onlar üçün “Turan Tovuz”la oyun cəlbedici olmaya bilər” – jurnalist rəyi
Fevralın 4-də - “Neftçi” ilə açılış oyununda Sumqayıtda elə ab-hava yaranmışdı, ki, dedik hə, vəssalam, xeyli azarkeş toplayan stadionlarımız siyahısına daha biri əlavə olundu.
Amma belə nağıllar və ümidlər cəmi iki həftə yaşadı. “Neftçi” ilə məlum oyunu 8100 azarkeş izləmişdisə, ötən bazar “Mehdi Hüseynzadə”yə cəmi 1480 azarkeş toplaşdı. Komandanın dekabrın 23-də “Kapital Bank Arena”da keçirdiyi sonuncu oyunu 1300 azarkeşin izlədiyini nəzərə alsaq, faktiki stadion böyüyüb, seyrçi sayı isə artmayıb. Yaxşı, bəs deyirdilər böyük şəhərə böyük stadion yaraşır... Böyük şəhərdə cəmi 1480 azarkeş tapıldı? Belə qəribəliyin səbəbini sumqayıtlı həmkarlarımız Rasim Sultanzadədən soruşduq:
“Əvvəla onu demək istəyirəm ki, 1480 tamaşaçı yazılmışdı, amma 3000 tamaşaçı var idi. Elə düşünürlər ki, Sumqayıt camaatının hamısı sosial şəbəkədədi. Amma Sumqayıt camaatı küçələrdə, parklarda, iş-gücdədi. “Sumqayıt”da reklam işi çox zəifdi. Tanıdığım 50 nəfər var idi ki, deyirdilər bilmədik “Sumqayıt”ın oyunu var. Bu, “Sumqayıt”ın piar və marketinq departamentinin səhvidi. Afişalar olmalıdı. Sumqayıt insanı futbolla nəfəs alır. Hava şəraiti pis idi. Məncə, rəqib komandadan da çox şey asılıdı. Rəqibin kimliyinə görə adamlar oyunu izləməyə gedir. Onlar üçün “Turan Tovuz”la oyun cəlbedici olmaya bilər. İnanmıram ki, bundan sonra belə alınsın. Azı 4-5 min azarkeş gələcək”.
ƏSƏD SEYİDOV
Digər xəbərlər
