Srağagün Türkiyə kubokunun 1/4 final mərhələsinə start verildi.

"Football-plus.az" xəbər verir ki, ilk oyun günündə “Fənərbaxça” fanatlarına əsl şok yaşatdı.

Kubokun son qalibi statusunda olan İstanbul nəhəngi Əmrə Belözoğlunun çalışdırdığı “Ankaragücü”nün qonağı oldu. Bu oyundan cəmi 10 gün öncə paytaxt təmsilçisi superliqa çərçivəsində İstanbulun digər nəhəngi “Qalatasaray”ı qəbul etmiş və 0:3 hesabıyla uduzmuşdu. Gözlənildiyi kimi, İsmayıl Kartal rotasiyaya əl atmışdı. Son superliqa oyunu ilə müqayisədə heyətdə 8 dəyişiklik edilmişdi. Favorit statusunda olan qonaqlar oyuna fəal başladı. Artıq 4-cü dəqiqədə Cengiz Ündərin zərbəsi təhlükəli alınsa da, top dirəyin yanında keçdi. Çox keçmədən Şimanskinin qüvvətli zərbəsini qapıçı çətinliklə dəf etdi. Əvəzində meydan sahibləri ilk ciddi hücumdaca hesabı açdı. 10-cu dəqiqədə sabiq “Qalatasaray”lı Morutsanın uzaq mısafədən zərbəsi zamanı top yolüstü komanda yoldaşı Əli Kaana da dəyərək tora daxil oldu. Bu qol “Fənər” üçün “soyuq duş” effekti verdi və komanda belə desək, oyununu itirdi. Paytaxt təmsilçisi qoldan cəmi 2 dəqiqə sonra Əli Sou ilə ikinci qolu vurmağa çox yaxın oldu. Amma komanda bunu 33-cü dəqiqədə bacardı. Sürətli hücum zamanı topu qəbul edən yunanıstanlı Xatziovannis yerlə uzaq küncü dəqiq nişan aldı. Kartal fasilədə 3 dəyişikliyə əl atsa da, komandasını “həyata qaytara” bilmədi. Qalan müddətdə ankaralıların hücumları yenə də daha təhlükəli alınırdı. Komandanın 69-cu dəqiqədə vurduğu qolun qarşısını VAR və ofsayd kəsdisə, 87-ci dəqiqədə hesabın darmadağın həddinə çatmasına heç kim mane ola bilmədi. Hərçənd “Qalatasaray” və “Fənərbaxça”nın sabiq üzvü Qarri Rodrigesin qolu zamanı yan xətt hakimi bayrağını qaldırsa da, VAR-ın incələməsindən sonra qol qeydə alındı. Oyunun sonlarına yaxın “Fənər” fanatlarının Belözoğlunun əleyhinə təhqiramiz şüarlar səsləndirməsi diqqəti çəkdi. Beləliklə, bu mərhələdə kubok son qalibini itirdi.

2024-cü ildə ilk dəfə uduzan “Fənərbaxça”nın rəsmi matçlarda 17 oyunluq məğlubiyyətsiz və 12 oyunluq qol seriyası bitdi. Komanda sonuncu dəfə Avropa Liqasının qrup mərhələsində səfərdə “Norşellan”a 1:6 uduzmuş və daha sonra keçirdiyi 17 oyundan 14 qələbə, 3 heç-heçə ilə ayrılmışdı. Kubok çərçivəsində əsası hələ 1964-cü ildə qoyulan rəqabətdə isə “Ankaragücü”nün “Fənər”ə qarşı 17-ci oyunda qələbə sayında bərabərliyi yaxalaması (8:8) diqqəti çəkir. Bundan başqa, paytaxt təmsilçisinin kubok çərçivəsində öz meydanındakı məğlubiyyətsiz seriyası 12 oyuna yüksəldi (10 qələbə, 2 heç-heçə)! Ötən mövsüm yarımfinala qədər irəliləyən “Ankaragücü” bu turnirdə öz meydanında sonuncu dəfə evdə 2020/21-də “Kocaelispor”a boyun əyib (1:2). “ Ankaragücü” yarımfinalda “Beşiktaş” – “Konyaspor” duelinin qalibi ilə qarşılaşacaq.

1/4 final
Ankaragücü – Fənərbaxça 3:0
Morutsan, 10. Xatziovannis, 33. Rodriges, 87.
Fənərbaxça: İrfan Can Eğribayat, Mərt Müldür, Sərdar Əziz (Mərt Hakan Yandaş, 65), Bonuççi, Osayi-Samuel (Fərdi Kadıoğlu, 46), Zayts (Sərdar Dursun, 46), Kruniç (İsmayıl Yüksək, 46), Cengiz Ündər (Oostervolde, 77), Şimanski, Tadiç, Batşuayi.
Trabzonspor – İstanbul BŞ 1:0
Visça, 57.
Beşiktaş – Konyaspor 2:0
Sakih Uçan, 32. Cenk Tosun, 58.

“Qalatasaray” – “Fatih Karagümrük” oyunu bu gün keçiriləcək.