İsveç yığmasında baş məşqçi probleminə son qoyulub. Komandaya Yon Dal Tomasson təyinat alıb.

Sabiq tanınmış futbolçu yeni iş yerində Yanne Anderssona xələf olub. İsveç Futbol Federasiyasının saytının yaydığı xəbərə görə, onunla müddəti 2026-cı ildə keçiriləcək dünya çempionatının seçmə mərhələsinin sonuna qədər nəzərdə tutulan müqavilə bağlanıb. Milli komanda seçmə turnirdə uğur qazanacağı halda müqavilə avtomatik olaraq daha iki il müddətinə uzadılacaq.

Danimarka yığmasının sabiq hücumçusu olan Tomasson futbolçu karyerasını 2011-ci ildə başa vurub. 2011-13-ü illərdə “Ekselsior”da köməkçi-məşqçi, 2013-14-cü illərdə baş məqşçi kimi çalışıb. Sonra “Roda” (2014), “Vitess” (2015-16, köməkçi-məşqçi), Danimarka yığması (2016-19, köməkçi-məşqçi), “Malmö” (2020-21) və “Blekbern”də (2022-24) işləyib. “Malmö” danimarkalı mütəxəssisin rəhbərliyi altında iki dəfə (2020, 2021) İsveç çempionu olub və Çempionlar Liqasının qrup mərhələsinə vəsiqə qazanıb.

Qeyd edək ki, İsveç yığmamızın Millətlər Liqasının qrupundakı rəqiblərindən biridi. Komandamız bu rəqiblə sentyabrın 5-də evdə, noyabrın 19-da isə səfərdə qarşılaşacaq.