“Eyni səbəbdən mən də İrandayam, Bakıya gələ bilmirəm”
Futzal üzrə yüksək liqanın 13-cü turunun oyunlarından birinin nəticəsi hər kəsi şoka saldı:
“Record club” “Neftçi”ya 3:36 hesabıyla uduzdu. “Record club”un rəhbəri Reza İbrahimi həmin oyundan sonra demişdi ki, növbəti çempionat oyununa çıxmayacağıq. Biz dünən bir daha Reza bəylə əlavə saxladıq:
“Əvvəl bizə deyirdilər ki, oturum verilir. Futzal Federasiyası bizə dəstək verməlidi. Federasiya Gənclər və İdman Nazirliyinə, nazirlik də Dövlət Miqrasiya Xidmətinə yazmalıdı ki, uşaqlar həqiqətən futzalçıdı, müvəqqəti yaşayış üçün, məsələn, 1 il, 6 ay Bakıda qala bilər. Bizə də oturum izni verilməyib, ziyana düşmüşük. Əvvəllər vermişdilər, indi vermirlər. Mən klubun rəhbəriyəm, o qədər xərc çəkirəm. Eyni səbəbdən mən də İrandayam, Bakıya gələ bilmirəm. Klubumun nə vəziyyətdə olduğunu da bilmirəm. Futzal Federasiyasına və AFFA-ya müraciət edirəm, heç kim cavab vermir. Bu axı düzgün deyil. Mən əcnəbi vətəndaşam, uşaqlara pul, mükafat verirəm. Dəyişən heçnə yoxdu. Mən də Futzal Federasiyasına yazmışam ki, iştirak etməyəcəm”.
Bəs bu məsələ necə həll olunacaq? Futzal Federasiyasının “Record club”a oturum izni almaqda kömək etmək şansı varmı? Bu suallarla Azərbaycan Futzal Federasiyasının mətbuat xidmətinin rəhbəri Mahal Məmmədova müraciət etdik:
“Klubun öz qərarıdı. Oyuna çıxmayacaqlarsa, texniki məğlubiyyət veriləcək. Bu hal 3-cü dəfə təkrarlansa, yarışdan kənarlaşdırılacaqlar. Əsasnamə bunu tələb edir. Qaldı oturum məsələsinə, bunu federasiya həll etmir. Aidiyyatı qurumlar məşğul olur ki, Reza bəy də ora müraciət edə bilər”.
ƏSƏD SEYİDOV
Digər xəbərlər
