Ötən həftə yüksək liqanın 19-cu turu çərçivəsində keçirilməli olan “Alyans” – “Record club” matçı ikincilərin meydana çıxmaması səbəbindən baş tutmayıb. Səbəb? Çox gülməli və biabırçıdı...

Futzal Federasiyasının mətbuat katibi Mahal Məmmədov “Futbol+”ə açıqlamasında “Record club”un əksər futzalçılarının və baş məşqçisinin İran vətəndaşı olduğunu bildirib. Onu da əlavə edib ki, onların “oturum izni” başa çatdığından vətənlərinə dönmək məcburiyyətində qalıblar. Yerli futzalçılar oynamağa hazır olsalar da, bu dəfə qapıçının zədəli olması onlara mane olub.

Heyətinə legioner qatan klublar ilk növbədə onun sənədləşmə işini həll etməyə çalışır. Ki, çempionatın gedişində hansısa problemlə üzləşməsin. Yəqin ki, “Record club” rəhbərliyi də mövsümün əvvəlində iranlıları dəvət edərkən çempionatın başa çatacağı tarixi nəzərə alıb. Belə olan halda çempionat bitmədən futzalçıların “oturum izni” ilə bağlı problem yaşaması acınacaqlı mənzərədi. Belə çıxır, “Record club” rəhbərliyində təmsil olunanlar üzərlərinə düşən işi yerinə yetirə bilməyən qeyri-peşəkarlardı, ya da bu məsələdə ictimaiyyətin bilmədiyi başqa qaranlıq məqamlar var.

Əldə etdiymiz məlumata görə, “Record club”un “rənglərinə bağladığı” iranlılar üçün mövsümün əvvəlində 6 aylıq “oturum izni” alınıb. Prosedura uyğun müddət başa çatanda klub rəhbərliyi AFFA-ya, assosiasiya isə Gənclər və İdman Nazirliyinə müraciət edir ki, bu müddət növbəti 6 ay üçün uzadılsın. Ancaq bu dəfə klub tərəfindən AFFA-ya belə müraciət daxil olmayıb. İki ölkə arasında münasibətlərin son vaxtlar soyuması bu məsələyə də təsir göstərib. Və bu səbəbdən iranlı legionerlərin Azərbaycanda çıxış etməsi problemə çevrilib.

Yaşananlarla bağlı “Record club”un iranlı rəhbəri Reza adlı bəylə danışmaq istədik. Soyadını dəqiqləşdirə bilmədiyimiz iranlı iş adamına zəng çatmadı. Mənbəmizin sözlərinə görə, Reza bəy özü də artıq Azərbaycanı tərk edərək İrana dönüb.

RƏŞAD