1-ci liqada 15-ci tura yekun vuruldu.

Son oyun günündə “İrəvan” “Mingəçevir”i qəbul etdi. Qonaqlar qələbə qazanıb, rəqibiylə xal fərqini azaltmaq niyyətindəydi. Heyətində ciddi itkilər olan, son vaxtlar başı qalmaqaldan açılmayan meydan sahibləri isə meydana ən azı uduzmamaq üçün çıxmışdı. “İrəvan”ın baş məşqçisi Nazim Süleymanov son açıqlamasında Fəhmin Muradbəyli ilə Ege Atlam Adnanın komandanı tərk etdiyini söyləmişdi. Təbii ki, bu səbəbdən ilk işim “aslanlar”ın start heyətinə baxmaq oldu. Mütəxəssisin dediyi kimi, Muradbəylinin adı iştirak ərizəsində yer almamışdı. Lakin Ege Atlam Adnan “İrəvan”ın start heyətində idi. Belə görünür ki, klub onunla danışıqlar aparıb, həll yolu tapa bilib. Bu mövzuda təxmin yürütmək yox, dəqiq olmaq istərdim. Amma matçdan sonra açıqlama almaq üçün klub rəsmilərindən heç kimi tapa bilmədim. Həmçinin “İrəvan”ın oyuna ikinci qapıçı olmadan çıxdığını da söyləmək lazımdı. Komandanın ehtiyat oyunçular skamyasında üç ada rast gəldim. Onların da arasında qolkiper yox idi. Yəni Andrey Sinenka zədələnsə və ya qırmızı vərəqə alsaydı, qapıya sahə oyunçusu keçəcəkdi. Xoşbəxtlikdən belə hal baş vermədi.
Turnir cədvəlinin orta pillələrində qərarlaşan komandaların qarşılaşması heç kəsə maraqlı deyildi. Çünki protokolda 40 tamaşaçı yazılsa da, mən 20-25 nəfərdən çoxuna rast gəlmədim. Həmin 20-25 nəfər də azarkeş deyildi. Bura AFFA nümayəndəsi, hakim-inspektor, operator, iki jurnalist, cəzalı-zədəli oyunçular və “Sabah”ın aşağı yaş qruplarının üzvləri daxil idi.

Görüşün startında qəribə hadisə baş verdi. “Mingəçevir” meydana 10 nəfərlə çıxdı. Kapitanların püşkatması zamanı 11-ci oyunçu Taleh Fərmanov da göründü. Oyun qonaqların üstünlüyü ilə başladı. Lakin meydan sahibləri erkən toparlanmağı bacardı. Kapitan Fərid Kərimzadənin 7-ci dəqiqədəki zərbəsi təhlükəli alınsa da, qapıçı yerində idi. 2 dəqiqə sonra Əli Əliyevin başla zərbəsi dəqiq olmadı. Buna baxmayaraq, “İrəvan” istəyinə erkən çatdı. 15-ci dəqiqədə Samir Qurbanov baxımlı zərbə ilə hesabı açdı. Qonaqların buna cavabı Xəyal Muradovun baş zərbəsi ilə gəlsə də, o, “çərçivə”yə düşə bilmədi. Ardından Ramin Məhərrəmov uzaq məsafədən dəqiq ola bilmədi. 28-ci dəqiqədə “Mingəçevir” qola yaxın oldu. Lakin Vidadi Cəfərovun zərbəsi dirəkdən qayıtdı. Həmin ərəfələrdə komandanın məşqçisi Ədəhim Niftəliyev kəskin etirazları ilə diqqəti çəkirdi. Tribunaların boş olduğundan onun dediyi sözlər aydın eşidilirdi. Mütəxəssis futbolçularına “məşqdə qapı torunu cırıq-cırıq edirsiz, indi vurun da”, - deyə əsəbləşir, hakimlərə etirazlar edirdi. Oyunun ən yaxşısı isə məncə, Balamirzə Soltanov idi. O, rəqiblərini ustalıqla aldadır, topla əla rəftar edirdi. Qonaqların heyətində isə kapitan Vidadi Cəfərov 31-ci dəqiqədə baxımlı zərbə ilə yadda qaldı. Onun qol vurmasına qapıçı mane oldu. Hücumun davamında Cəfərovun ikinci zərbəsini müdafiəçilər boş qapıdan çıxardı. “Mingəçevir” 40-cı dəqiqədə daha bir real qol şansını qaçırdı. Əsədulla Heydərov təxminən 4 metrdən topu qapıya göndərə bilmədi. 44-cü dəqiqədə Balamirzə Soltanov fərdi reydini gözəl ötürmə ilə tamamladı. O, Samir Qurbanovu qapıçı ilə üz-üzə çıxardı. Lakin sonuncu zərbə fürsətini boşa verdi.

İkinci yarı da eyni tempdə davam etdi. Hissənin startında Vidadi Cəfərovun daha bir qüvvətli zərbəsi dirəkdən qayıtdı. Davamında Nihad Xəlilinin zərbəsini müdafiəçilər küncə çıxardı. 1 dəqiqə keçmədən yenidən Cəfərov səhnəyə çıxdı. Onun növbəti zərbəsini qapıçı dəf etdi. 54-cü dəqiqədə “İrəvan” fərqi artırmağa nail oldu. Lakin referi oyundankənar vəziyyət qeydə aldı. 72-ci dəqiqədə qonaqlar daha bir təhlükəli vəziyyət yaratdı. Aqil Nəsibovun zərbəsi qapının üstündən keçdi. 5 dəqiqə sonra yenidən Cəfərov meydan sahiblərinə həyəcanlı anlar yaşatdı. Lakin onun başla zərbəsi dəqiq olmadı. “Mingəçevir”in kapitanı 79-cu dəqiqədə daha bir dəfə qapını yoxladı. Bu dəfə Sinenka çətinliklə topu küncə çıxardı. Oyunun sonlarında Samir Qurbanov komandasının 2-ci qoluna imza atmağa yaxın idi. Lakin təxminən 11 metrdən dəqiq ola bilmədi.
Beləliklə, “Mingəçevir”i məğlub edən “İrəvan” xal sayını 23-ə çatdırdı və 6-cı pillədəki yerini qorudu.