''Qalatasaray''ın əsas ulduzu və qol silahı Mauro İkardi özünə problem yaradıb.

"Football-plus.az" xəbər verir ki, argentinalı forvard cəza almaq təhlükəsi ilə üzləşib.

Bilindiyi kimi çərşənbə günü ''Qalatasaray'' Türkiyə kubokunun 1/4 finalında öz meydanında ''İstanbul BŞ''yə gözlənilmədən 2:3 hesabı ilə uduzaraq mübarizəni dayandırmalı olmuşdu. İkardi həmin qarşılaşmada komandasının 2-ci qolunu vurmuşdu.

''Qalatasaray'' cəbhəsi oyundan sonra hakimlikdən ciddi şəkildə gileylənmişdi. Onların fikrincə, hakim 2 epizodda komandanın lehinə penalti təyin etməmişdi. Matçın ardından İkardi 10 milyon təqibçisi olan ''instaqram'' hesabının hekayə bölümündə ''Bir utanc... Bir skandal... İlin soyğunu'' paylaşımını etmişdi.

Bu paylaşıma görə 29 yaşlı futbolçu idmançıya yaraşmayan hərəkət maddəsi ilə Nizam-İntizam Komitəsinə sövq edilib. Komitə məsələ ilə bağlı klubun və futbolçunun fikirlərini dinlədikdən sonra qərar verəcək. İkardiyə 1 oyunluq cəza veriləcəyi istisna edilmir. Türkiyə futbolunda oyunçuların sosial şəbəkədəki paylaşımlarına, açıqlamalarına görə cəza alması faktına bir neçə dəfə rast gəlinib. Məsələn, ötən mövsümün əvvəllərində ''Fənərbaxça''lı Brayt Osayi-Samuel sosial şəbəkədə hakimi təhqir etdiyinə görə 3 oyunluq cəza almışdı.

Qeyd edək ki, İkardidən başqa ''Qalatasaray'' prezidenti Dursun Özbək, ''Beşiktaş'' prezidenti Ahmet Nur Çəbi və ''İstanbul BŞ''nin baş məşqçisi Əmrə Belözoğlu da NİK-ə sövq ediliblər.