''Qalatasaray'' camiəsi Mauro İkardidən gələn xəbərləri gözlədiyi bir vaxtda rəhbərlik bütün mümkün variantlara əl atır.

"Football-plus.az" xəbər verir ki, dünən başqan vəkili Ərdən Timur İtaliyada argentinalı forvard və onun meneceri Vanda Nara ilə görüşdü. Türkiyə mətbuatının yazdığına inansaq, Timur İkardiyə illik 7,5 milyon avro məvacib təklif edib! Daha öncə klub tarixində heç kimə bu cür məbləğ təklif olunmayıb. Hərçənd İkardiyə Səudiyyə Ərəbistanından illik 20-25 milyon avroluq təkliflərin gəlməsi barədə xəbərlər doğrudusa, İstanbul nəhənginin təklifi yenə də çox zəif görünür. Bu arada məlum olub ki, Timur görüş zamanı İkardiyə ''Qalatasaray'' fanatının hərəkətindən danışıb. Bilindiyi kimi bu yaxınlarda fanatlardan biri yeni doğulan körpəsinin adını ''İkardi Korkmaz'' qoymuşdu. Timur İkardinin Türkiyədə nə qədər sevildiyini göstərmək üçün argentinalıya həmin körpənin üzərində adı qeyd olunmuş doğum kağızını da göstərib. Timur ''bunu dünyanın başqa heç bir yerində görə bilmərsən, ''Qalatasaray'' səni, sən də klubu çox sevirsən'' sözləri ilə İkardini klubda qalmağa razı salmağa çalışıb.

Xatırladaq ki, 30 yaşlı futbolçu müqavilə ilə PSJ-yə məxsusdu.

ƏLİ RAUFOĞLU