Göz dəyməsin, premyer-liqada 23-cü tur hədsiz səliqəli mübarizə ilə müşayiət olundu.

Dörd oyunda cəmi 16 sarı vərəqə göstərilib ki, bu da cari mövsümdə çempionatımızda müəyyənləşən standartlarla müqayisədə aşağı göstəricidi. Üstəlik nə qapılara penalti təyin olunub, nə də meydandan qovulan futbolçu olub. Konkret oyunlara gəlincə...

Sabah – Kəpəz, ELÇİN MƏSİYEV
Masazırdakı qarşılaşma yetərincə gərgin və baxımlı keçdi. Qol baxımından turun ən məhsuldar oyununda qayda pozuntuları da çox idi. Əlbəttə, sürət, intensivlik varsa, belə hallar qaçılmazdı. Lakin etiraf edək ki, “Kəpəz” bu baxımdan geridə qalırdı. Onlar rəqibin irəliləməsinə mane olmaqdan ötrü istənilən vasitəyə əl atırdı. Təsadüfi deyil lo, Elçin Məsiyev 8 sarı vərəqədən beşini məhz qonaqlara göstərdi. Ümumilikdə matçın ədalətli idarə olunduğunu qeyd edə bilərik.

Sumqayıt – Turan Tovuz, RAUF CABBAROV
Bu matçda nizam-intizam baxımından ciddi çatışmazlıq olmadı. Lakin bunu oyunçuların diqqətli çıxışıyla əlaqələndirmək doğru olmaz. Sanki futbolçular rəqiblə mübarizədə “dərinə getmək” fikrində deyildi. Belədə referinin işi də xeyli asanlaşdı. Onu vurğulayaq ki, Ayxan Abbasov oyunboyu bir neçə dəfə hakimə etiraz etdi. Mütəxəssisi bu məanada haqlı saymaq olar. Çünki Cabbarov “Turan Tovuz”un oyunçuları qaydaları pozarkən dərhal oyunu saxlayırdısa, “Sumqayıt” üzvlərinin bir neçə kobud müdaxiləsi zamanı susdu. Ədalət təmsilçisi görüşü qənaətbəxş idarə etdi, amma daha yaxşısı, əlbəttə, mümkün idi.

Səbail – Araz-Naxçıvan, KAMRAN ƏLİYEV
Oyunun gərgin mübarizə şəraitində keçməsi hakimlərin işini bir qədər çətinə saldı. Xüsusən də azarkeşlərin hakim qərarlarını fitə basması və təhqiramiz şüarlar işlətməsi Kamran bəyə psixoloji təsir göstərirdi. Oyun ərzində Azər Bağırovun bəzi epizodlarda hakimə kəskin etirazlarının şahidi olsaq da, oyunsonrası mətbuat konfransında bu yöndə heç bir narazılıq olmadı. Baş məşqçi həmişəki kimi hakimlərə də dəstək lazım olduğunu dedi. Şahin Diniyev də ənənəsinə sadiq qalaraq, bu barədə fikir bildirmədi. Oyunda isə şübhə doğuran iki epizod oldu. Birincisi 68-ci dəqiqəyə təsadüf etdi. Qonaqların futbolçusu Aksel Nqandonun yerdə qalmasına görə bütün kollektiv penalti tələb etdi. Digəri isə 85-ci dəqiqədə meydan sahiblərinin oyunçusu Pedro Nunonun qolkiperlə mübarizədə yerdə qalması idi. Epizodlara sonradan baxdıqda hakimin doğru qərar verdiyini görürük.

Neftçi – Zirə, ƏLİYAR AĞAYEV
Turun mərkəzi görüşü təcrübəli FIFA referisinə tapşırılmışdı. Gözlənildiyi kimi, oyun gərgin keçdi. İlk hissənin son dəqiqəsində qonaqlar bərabərlik topunu vursa da, qol qeydə alınmadı. Referi VAR-ın məsləhətindən sonra epizoda təkrar baxdı və bu qərarı verdi. Buna səbəb isə qoldan öncə Qismət Alıyevin Kilan Lebona qarşı kobud oynaması idi. İkinci hissənin ortalarında “Zirə”nin daha bir qolu qeydə alınmadı. Bu dəfə Ağayev VAR-ın köməyinə ehtiyac duymadan, topun ötürmə zamanı meydanı tərk etdiyini bildirdi. Videotəkrara baxdıqda baş hakimin qərarlarının doğru olduğunu görürük. Referi oyunu ideala yaxın səviyyədə idarə etdi. Hərçənd Rəşad Sadıqov bu dəfə də narazılığını gizlətmədi.