Sabah bütün diqqətlər “Azərsun Arena”da keçiriləcək “Qarabağ” – Neftçi” matçına yönələcək.

Ağdam təmsilçisi çempionluq yolunda həlledici qarşılaşmalarından birinə çıxacaq. Düzdü, indiki vəziyyətdə “Suraxanıda baş tutacaq matça “həlledici” demək də bir qədər absurddu. Çünki, birinci pillədə qərarlaşan Qurban Qurbanovun komandası ilə 3-cü yerdə olan “ağ-qaralar” arasında 13 xallıq fərq var. Ancaq mətbuatın, azarkeşlərın “Azərbaycan derbisi” adı verdiyi oyun istər klubların ölkə futbolunda yeri, istərsə də statistika baxımından cəlbedici görünür.

Statistikadan söz düşmüşkən, hər nə qədər “Azərbaycan derbisi” deyib, “Qarabağ” – “Neftçi” oyununu xüsusi qabartsaq da, bu matç vaxtilə ölkə futboluna səs salan, “böyük oyun”lar qədər azarkeş cəlb etmir. Sabahkı qarşılaşma bu komandalar arasında cari mövsümdə üçüncü olacaq. Birinci dövrədə “Azərun Arena”da keçirilən “Azərbaycan derbisi”ni 4000, ikinci dövrədə “Bakcell Arena”da baş tutan oyunu isə 7000 azarkeş izləyib. Yəni iki qarşılaşmaya cəmi 11000 azarkeş... Bəs bunun nəyi “Azərbaycan derbisi” oldu? Ad baxımından gurultulu səslənsə də, reallıqda “Qarabağ”la “Neftçi” arasında keçirilən qarşılaşmalar “böyük oyun”ların heç kölgəsini xatırlatmadığını vurğulamaq lazımdı. Lənkərandakı oyunlarda stadion tam dolurdusa, daha dəqiq desək, 15 min azarkeş tribunalarda yer alırdısa, paytaxtdakı görüşlərdə bəzən bundan da çox azarkeş olurdu. Odu ki, azarkeşlər “Azərbaycan derbisi”nin adını doğruıtmaq istəyirsə ilk növbədə stadiona üz tutmalı, 90 dəqiqə könül verdikləri komandaya yerində dəstək olmalıdı.

RƏŞAD