“Qalatasaray”ın başında cəmi 2-ci mövsümünü keçirməsinə baxmayaraq, indidən adını klub tarixinə yazdıran və bir çox yeni rekordların müəllifi olan Okan Burukun iş həyatından fərqli şəxsi həyatı çox da uğurlu keçmir.

“Football-plus.az” xəbər verir ki, bununla bağlı ortada rəsmi bir açıqlama olmasa da, Türkiyə mətbuatında yayılan şayiələrə görə, 50 yaşlı mütəxəssisin 17 illik ailəsi dağılıb! Belə ki, o, həyat yoldaşı Nihan Akkuşdan boşanıb. Hətta deyilənə görə, bu cütlük hələ ötən ay boşanıbmış. Sadəcə, üstü indi açılıb. Ailə həyatı qurandan sonra “Buruk” soyadını götürən 1983-cü il təvəllüdlü Nihan Akkuş Türkiyənin məşhur modellərindəndi. O, hələ 2003-cü ildə Almaniyada keçirilən “Top Model of the World” müsabiqəsinin qalibi olaraq dünyanın ən gözəl xanımı seçilmişdi. Bundan başqa, Akkuş müxtəlif dönəmlərdə aktrisa, aparıcı və dizayner kimi də fəaliyyət göstərib. Cütlük 2007-ci ilin iyulunda ailə həyatı qurub və onların bir övladı var. Ailədə 2009-cu ildə Əli Yiğit Buruk adını verdikləri oğlan dünyaya göz açmışdı. Deyilənə görə, ilk dəfə hələ 11 il öncə məhkəməyə baş vuran cütlük 2013-cü ildə boşanmağa çox yaxın idi. Amma o vaxt sonradan Buruk ilə Akkuş yenidən barışaraq ailəni dağıtmamaq və bir-birinə daha bir şans vermək qərarına gəlmişdi. Bu dəfə isə belə görünür, hər şey çox ciddidi. Çünki “Sabah” nəşrinin yazarı Bülənt Cankurtun iddiasına görə, Okan Burukun yaxınları da onun boşandığını təsdiqləyib. Qeyd edək ki, 2022-ci ilin əvvəllərində ailənin yeganə övladı Əli Yiğit Buruka leykoz, yəni qan xərçəngi diaqnozu qoyulmuşdu. Bu üzdən Buruk məşqçi karyerasında bir müddət fasilə götürərək özünü ailəsinə həsr etmiş və Fransada müalicə olunan oğlunu yalqız buraxmamışdı. Xoşbəxtlikdən müalicə bəhrə verib və hazırda 15 yaşı olan Əli Yiğit Buruk xəstəlikdən qurtulub. Onu tez-tez “Qalatasaray”ın oyunlarında tribunada görmək mümkündü.