Mahir Emrelinin karyerasıyla bağlı qeyri-müəyyənliyə tezliklə aydınlıq gələ bilər.

26 yaşlı hücumçunun Zaqreb "Dinamo"sunun “Roqaşka” ilə yoxlama görüşündə zədələndiyini bilirsiz. Əlbəttə, zədə start heyətində möhkəmlənə bilməyən futbolçunun Xorvatiya çempionatındakı gələcəyi üçün real təhlükədi. Mahir bunu anladığından komandadan ayrılmaq qərarı verib.
"Football-plus.az"ın əldə etdiyi məlumata görə, millimizin hücumçusu Türkiyənin 1-ci liqa təmsilçisi "Kocaelispor"la danışıqlara başlayıb. Maraq üçün qeyd edək ki, qardaş ölkədə "transfer pəncərəsi" bağlanıb. Belədə Emreli "Dinamo" ilə anlaşaraq ayrılmalı və azad agent statusu əldə etməlidi. Hazırda bu yöndə müvafiq işlər görülür.

Digər tərəfdən, "Kocaelispor"un yığmamızın üzvünü transfer etmək istəyi əbəs deyil. Klub hələ mövsümün əvvəlində Mahirə təklif yollasa da, o, 1-ci liqada çıxış etmək istəmədiyini demişdi. İndi Türkiyə təmsilçisinin əsas hücumçusu Duqlas Tankenin komandadan ayrılması, həmçinin heyətdə Ramil Şeydayevin də olması sövdələşmənin uğurla nəticələnəcəyini proqnozlaşdırmağa əsas verir.

KƏNAN BAHADIR