''Qalatasaray''ın yeni transferlərindən olan və bir oyuna belə çıxmayan Serj Orye hələ bir müddət də oynaya bilməyəcək.

Baş məşqçi Okan Buruk ''Sparta''ya qarşı oyundan sonra təcrübəli futbolçunun Afrika Millətlər Kubokundan zədəli halda qayıtdığını və onun oynamağa nə vaxt hazır olacağını bilmədiyini qeyd etmişdi.

Klubdan verilən rəsmi açıqlamada kot d'İvuarlı müdafiəçinin ayağının arxa əzələsində gərginlik olduğu vurğulanılıb. Bu da o deməkdi ki, 31 yaşlı futbolçu təxminən 3 həftəliyə sıradan çıxıb. İstanbul nəhənginin bu qış 100 min avroya ''Nottingem Forest''dən transfer etdiyi 31 yaşlı futbolçu superliqada ''Ankaragücü'', ''Antalyaspor'', ''Fatih Karagümrük'', ''Beşiktaş'', eləcə də Avropa Liqasında ''Sparta''ya qarşı cavab oyununu buraxacaq.

Qeyd edək ki, Orye kapitanı olduğu Kot d'İvuar yığması ilə ötən həftəsonu başa çatan Afrika Kubokunun qalibi olmuşdu. O, finalda Nigeriyaya qarşı matçda zədələnərək 70-ci dəqiqədə əvəzlənmişdi.