Çempionluq uğrunda amansız mübarizə aparan “Fənərbaxça” ilə “Qalatasaray”ın hərəsi bir aparıcı futbolçusunu itirib.

"Football-plus.az" xəbər verir ki, ötən tur “Samsunspor”la oyunun son anlarında “Fənər”in yarımmüdafiəçisi Fred zədələnərək əvəzlənmişdi. Ünlü braziliyalı futbolçunun tibbi müayinəsinin cavabı bəlli olub. Sağ ayaq əzələsində yırtıq aşkarlanan “sambaçı” ən yaxşı halda 4, ən pis halda isə 6 həftəliyə sıradan çıxıb! Mövsümün əvvəlində 9,7 milyon avroya “Mançester Yunayted”dən transfer edilən və “Fənər”də indiyə qədər 21 rəsmi oyuna çıxaraq 6 məhsuldar ötürmə ilə yadda qalan 30 yaşlı futbolçunun budəfəki yoxluğunun komandaya necə təsir edəcəyi maraq doğurur. Çünki bu mövsüm İstanbul nəhəngi onun olmadığı qarşılaşmalarda ciddi problemlər yaşayır. Təkcə bir faktı vurğulayaq ki, “Fənər” bu mövsüm superliqada xal itirdiyi 4 qarşılaşmanın hamısını Fredsiz keçirməli olub. Bundan başqa, “sarı-lacivərdlilər”in Konfrans Liqasının qrupunda məğlub olduğu hər iki görüşdə də Fred iştirak etməyib.

“Qalatasaray” isə müdafiənin dirəyi sayılan Əbdülkərim Bardakcını itirib. Təcrübəli futbolçu ötən tur “Trabzonspor”la oyunda fasilə ərəfəsində zədələnərək əvəzlənmişdi. Əbdülkərimin isə sol ayaq əzələsində qismən yırtıq aşkarlanıb və o da təxminən 3-4 həftəliyə sıradan çıxıb. Fevralın 15-də “Qalatasaray”ı Avropa Liqasının pley-offunda İstanbulda “Sparta” ilə oyun gözləyir. Klubun tibbi personalı Bardakcını həmin oyuna qədər sıraya qaytarmağa çalışacaq. Sevindirici xəbər odu ki, digər mərkəz müdafiəçisi Devinson Sançes artıq zədəsini sağaldıb. Qarşıdakı oyunlarda müdafiənin mərkəzində Sançeslə Viktor Nelssonun tandemini izləyəcəyik. Türkiyə yığmasının da aparıcı müdafiəçilərindən sayılan Əbdülkərim bu mövsüm çox inamlı təsir bağışlayırdı. 2023/24-də o, “Cim-Bom”un heyətində 32 rəsmi oyuna çıxaraq 5 qol vurmuşdu.