''Qalatasaray'' ilə ''Bavariya'' arasında Saşa Boenin transferi ilə bağlı aparılan danışıqlar uğurla başa çatıb.

Fransalı müdafiəçi ən qısa müddətdə rəsmi olaraq Münhen nəhənginin futbolçusuna çevriləcək. ''Bavariya'' neçə müddətdi ki, sağ cinah müdafiəçisi axtarışında idi.

Komandada həmin mövqedə oynayan Nassir Mazraui hazırda Mərakeş yığması ilə Afrika Millətlər Kubokunda iştirak edir. Bu azmış kimi məcburiyyətdən həmin mövqedə oynayan Konrad Laymer də zədələnərək bir neçə həftəliyə sıradan çıxıb.

''Rekordmayster'' əvvəlcə ''Nyukasl''lı Kiran Trippyeni transfer etmək istəyirdi. İngilislər 15 milyon avro tələb edirdi.

Munhenlilər futbolçunun yaşını (33) nəzərə alaraq bu məbləği ödəmək istəmədilər. Bu üzdən onlar daha gənc və perspektivli Saşa Boeyə yönəldilər. Fransalı müdafiəçi bu mövsüm Çempionlar Liqasında ''Bavariya''ya qarşı oyunlarda əla təsir bağışlamışdı. ''Qalatasaray'' əvvəlcə 20 milyon avro, sonra ''25+5'' milyon avroluq təklifi geri çevirdi. ''Bavariya''nın 29 milyon avroluq 3-cü təklifi isə İstanbul nəhəngini qane etdi. Müqavilədə bonuslar da nəzərdə tutulub. Boe bu gün səhər saatlarında ''Bavariya''nın göndərdiyi xüsusi təyyarə ilə Münhenə yola düşdü. Tibbi müayinədən sonra bu transfer rəsmən açıqlanacaq. Boe beşillik müqaviləyə imza atacaq. Onun illik məvacibi isə 3 milyon avro olacaq. Bu, həm də Türkiyə futbolunun ən bahalı satışı kimi tarixə düşəcək. Hazırda rekord Cenk Tosuna məxsusdu. O, 2018-də 22,5 milyon avroya ''Beşiktaş''dan ''Everton''a transfer olunmuşdu.

Qeyd edək ki, ''Qalatasaray'' Boeni 2021-in yayında ''Renn''dən cəmi 1 milyon avroya transfer etmişdi. İlk mövsümdə heç nə ilə yadda qalmayan və hətta ayrılması gündəmdə olan 23 yaşlı futbolçu Okan Burukun gəlişindən sonra şans qazanmağa başladı. Boe bu mövsüm 31 rəsmi oyuna çıxaraq 2 qol vurub. Onu da bildirək ki, ''Cim-Bom'' 29 milyon avronun 15 faizini, yəni 4,35 milyon avronu Boenin əvvəlki klubu ''Renn''ə ödəyəcək.

ƏLİ