Tadiç də Türkiyədəki stadionların durumundan gileyləndi
Türkiyədəki stadionların ot örtüyü müzakirə mövzusu olmaqda davam edir.
Ən son ''Ankaragücü''nün baş məşqçisi Əmrə Belözoğlu ''Sivasspor''a qarşı ev oyununun (0:0) ardından doğma ''Eryaman'' stadionunun ot örtüyünü yıxıb-sürülmüşdü. Bu dəfə ''Fənərbaxça''nın serbiyalı ulduzu Duşan Tadiç Türkiyədəki ot örtüklərinin durumundan narazılıq edib.
İstanbul nəhəngi son turda səfərdə ''Antalyaspor''u 2 cavabsız qolla məğlub etmişdi. Tadiç Antalyadakı stadiondan narazılıq edərək bunları deyib:
"Demək olar, bütün səfər oyunlarında olduğu kimi bu dəfə də bərbad ot örtüyü ilə qarşılaşdıq. Bu şərtlərdə futbol oynamaq asan deyil. Məncə, Türkiyə futbolu üçün bu problemi dilə gətirmək çox önəmlidi. Çünki səfər oyunlarında gördüyümüz ot örtüklərini qəbul etmək və orda futbol oynamaq mümkün deyil. Türkiyə futbolunu inkişaf etdirmək istəyənlər bu məsələyə ciddi diqqət ayırmalıdı. Öz meydanımızdakı örtük çox yaxşı durumdadı. Amma səfərdə gördüklərim bərbad vəziyyətdədi. Bu da işimizi çətinləşdirir''.
Sabah Türkiyə kubokunun 1/8 finalında ''Fənərbaxça'' ''Qaziantep''in qonağı olacaq. Maraqlıdı ki, bu komandalar yanvarın 14-də superliqa çərçivəsində qarşılaşmış və İstanbul nəhənginin böyük çətinliklə əldə olunan minimal hesablı qələbəsinin ardından baş məşqçi İsmayıl Kartal Antepdəki arenanın ot örtüyündən ciddi şəkildə gileylənmişdi. ''Qaziantep''in qalmaqalçı baş məşqçisi Marius Şumudika isə ''federasiya icazə verirsə, deməli bu meydanda oyun keçirmək olar'' açıqlaması ilə Kartalın cavabını vermişdi. Görək, bu dəfə bu mövzuda nələr yaşanacaq.
ƏLİ
Digər xəbərlər
