Çərşənbə axşamı Çempionlar Liqasında 1/8 final mərhələsinin ilk iki oyunu keçirildi.

“Football-plus.az” xəbər verir ki, səfərdə çıxış edən komandalar – “Real” və “Mançester Siti” 1/4 finala adlamaq yolunda önəmli addım atdı. Düzdü, bu iki qələbəni tərəzinin eyni gözünə qoymaq olmaz. O mənada ki, aşkar üstün təsir bağışlayan “şəhərlilər” bunu hesabda da əks etdirdi. “Real” isə haqq etmədiyi qələbəni qazandı.

Çempionlar Liqası. 1/8 final, ilk oyun
Leyptsiq – Real 0:1 (0:0)
Leyptsiq (Almaniya): Qulaçi, Simekan, Klostermann, Orban, Raum, Olmo (Elmas, 75), Henrixs (Aydara, 75), Şlager (Kampl, 90), Simons, Openda (Poulsen, 75), Şeşko.
Real (Madrid, İspaniya): Lunin, Karvaxal, Naço, Çuameni, Mendi, Valverde, Kroos, Kamavinqa, Dias (Vaskes, 84), Rodriqo (Xoselu, 84), Vinisius.
Qol: Dias, 48.
Vərəqələr: Simakan, 53. Karvaxal, 66. Poulsen, 77. Vinisius, 85. Şeşko, 86 – sarı.
Hakim: İrfan Pelto (Bosniya və Hersoqovina).
13 fevral. Leyptsiq. 45028 tamaşaçı.
oyunun statistikası
15 (9) qapıya (çərçivəyə) zərbə 15 (3)
7 künc zərbəsi 3
2 ofsayd 0
10 qayda pozuntusu 12
3 (0) sarı (qırmızı) vərəqə 2 (0)
49 topa sahibolma (faizlə) 51

“Leyptsiq” indi heç də ən yaxşı dönəmini yaşamır: qıs fasiləsindən dönən “qırmızı öküzlər” 5 oyunun üçündə uduzub, yalnız birində qələbə qazanmaqla bundesliqada 5-ci yerə düşmüşdü. Onu da qeyd etməyə dəyər ki, “Leyptsiq” indiyə qədər tarixində yalnız bir dəfə - 2019/20 mövsümündə 1/8 final mərhələsini adlaya bilib. Marko Rozenin “Real”la oyun ərəfəsində kadr problemi yox idi. Uzaqbaşı orta sahənin aparıcı oyunçularından Aydaranın Afrika Millətlər Kubokundan sonra yüngülvari narahatlıq hiss etməsini önə çəkmək olar. Ancaq malili yarımmüdafiəçi də madridlilərlə qarşılaşmaya planauyğun şəkildə hazırlaşmışdı. Almanların bombardiri Openda da əla formada idi – son 4 oyunun hamısında fərqlənmişdi. Unutmaq lazım deyil ki, məhz belçikalı qrup mərhələsində “Mançester Siti”nin qapısından 3 top keçirmişdi. “Leyptsiq”in zəif yeri isə müdafiədi: komanda son 5 oyunda 11 qol buraxmışdı. Bu komandanın müdafiəçiləri hər oyunda rəqibə orta hesabla 12,6 zərbə vurmaq imkanı verir.
Bəs “Real”ın durumu haqda nə demək olar? Madrid nəhəngi qarşısına çıxanı, sadəcə, əzib keçir. Karlo Ançelottinin komandası hətta ənənəvi yanvar enişindən də yan keçə bilib: “ağ şimşəklər” buna qədər 2024-də keçirdiyi 10 oyunun 8-də qələbə qazanmış, 1-də heç-heçə etmiş və yalnız 1-də uduzmuşdu. Son oyunda heyətdə bir nominal mərkəz müdafiəçisi olmadan “Jirona”nı da darmadağın etmişdilər (4:0). Qapıçı Kurtuanın hələ də komandasına kömək edə bilməməsi öz yerində, Bellingem də zədə üzündən Almaniyaya aparılmamışdı. Bu başqa məsələ ki, “Real” cari mövsümündə ən yaxşı bombardirinin yoxluğunda keçirdiyi 4 oyunun hamısında qələbə qazanmışdı.
Nəhayət, daha bir önəmli məqam: bu nə sirrdisə, “Real” Çempionlar Liqasında həmişə canlanır, ikiqat motivasiya ilə oynayır. Madridlilər buna qədər ardıcıl üç il 1/8 final səddini uğurla adlayıb.

...Təbii ki, “Real” Leyptsiqə qələbə arxasınca təşrif buyurmuşdu. Ancaq ünlü rəqib önündə “qırmızı öküzlər”in dizləri əsmədi, onlar debütdəcə Luninin qoruduğu qapıya yol tapdılar. Ancaq Şeşkonun vurduğu qol hücum zamanı qayda pozuntusu üzündən qeydə alınmadı. Bundan sonra madridlilər topa nəzarəti ələ keçirərək “1 nömrə” kimi oynamağa başladılar. “Leyptsiq” isə təhlükəli əks-hücumlar qururdu. Təhlükəli zərbələri dəf edən Lunun dəfələrlə oyuna qoşulmalı oldu. Rozenin çalışdırdığı komanda qətiyyən favoritin ayaqları altına növbəti mərhələyə aparan qırmızı xalça sərmək niyyətində deyildi. Madridlilər ilk yarıda Çuameninin baş və Kroosun uzaq məsafədən zərbəsi ilə yadda qaldı. Ümumilikdə komandalar ilk yarıda səhvləri minimuma endirməklə səviyyəli futbol göstərdi.

Qonaqlar 2-ci hissənin əvvəlində hesabı açdı: üç rəqibdən uzaqlaşan Dias gözəl zərbə ilə uzaq yuxarı küncü “nişan aldı”. “Leyptsiq” topa nəzarəti ələ keçirsə də, bütün cəhdləri Luninin etibarlı oyununa ilişib qalırdı. “Real” qələbəni möhkəmləndirə bilərdi, Vinisiusun cərimə meydançası daxilindən zərbəsindən sonra top dirəyə tuş gəldi. “Qırmızı öküzlər” son ana qədər hesabı bərabərləşdirməyə çalışsa da, Lunin keçilməz səddə çevrildi, bütün təhlükələrin qarşısını adı. Nəticədə minimalhesablı qələbə qazanan “Real” 1/4 final yolunda ilk addımı atdı.

Oyundan sonra
Karlo Ançelotti, “Real”ın baş məşqçisi: “Çalışqanlıq sayəsində bu qələbəni qazandıq. “Leyptsiq” yaxşı müqavimət göstərsə də, futbolçularımın oyundan qopmadığını bilirdim – bəzi vacib oyunçuların yoxluğuna baxmayaraq, yaxşı müdafiə olunurduq. Əks-hücumlarda necə təsir bağışlamağımız da xoşuma gəldi. Ancaq etiraf etməliyəm ki, “Leyptsiq” asanlıqla hesabı bərabərləşdirə bilərdi”.
Marko Roze, “Leyptsiq”in baş məşqçisi: “Komandam cəsarətli oynadı. Planlaşdırdığımız işlərin çoxunu gördük, məsələn, Vinisiusa qarşı oyunu gücləndirdik. Fasilədən sonra rəqib baxımlı qol vurdu, ona görə ki, Diasa hərəkət azadlığı verdik. Bunu qəbul etmək lazımdı. Özümüzün də yaxşı imkanlarımız oldu, ancaq reallaşdırmağı bacarmadıq”.
Braim Dias, “Real”ın hücumçusu: “Bu dueldə intriqanı öldürə bilərdik. Ancaq demək lazımdı ki, “Leyptsiq”in də imkanları var idi. Düşünürəm ki, azarkeşlər baxımlı futboldan ləzzət ala bildi. Ancaq oyunun qarşılıqlı hücumlar şəraitində davam etməsi bizə elə bir böyük qazanc gətirmədi”.
David Raum, “Leyptsiq”in müdafiəçisi: “Yaxşı oynadıq, ancaq qol imkanlarından yararlanmaq lazım idi. Yetərincə təhlükəli vəziyyət yaratdıq, “Real” isə bu oyundan maksimumu qopardı. Bu vəziyyəti dəyişə bilərik, ancaq cavab görüşündə “artırmaq” lazımdı”.
Benyamin Şeşko, “Leyptsiq”in hücumçusu: “Çox yaxşı oynadıq, səviyyəli komanda olduğumuzu göstərdik. Bu gün azacıq nəsə çatmadı. Ümid edirəm ki, ikinci oyunda yaxşı olacaq. Həmişə qol imkanlarımızın olacağına inanmaq lazımdı”.
Dani Olmo, “Leyptsiq”in yarımmüdafiəçisi: “Nəticədən razı deyilik, axı qol vəziyyətlərinin sayına görə “Real”ı üstələdik. Amma qol vura bilmədik. Dias çox səviyyəli oyunçudu, şansdan yararlandı. “Real” Avropanın ən yaxşı komandalarından biridi. Belə rəqiblərlə oyunlarda imkandan yararlanmaq lazımdı”.
Toni Kroos, “Real”ın yarımmüdafiəçisi: “Fərdi reyd bugünkü oyunun taleyini həll etdi. Oyun hər iki komandanın xeyrinə bitə bilərdi. “Leyptsiq” ilk yarıda hadisələrin axarına yaxşı nəzarət etdi, ikincidə isə biz üstün idik. Nəticədə Diasın qolu həlledici oldu. Bu məqam oyunun axarını bizim xeyrimizə həll etdi”.

Faktlar
* Rodriqo “Real”ın heyətində bütün turnirlərdə 200-cü oyununu keçirdi. Braziliyalı hücumçu bu oyunlarda 50 qol və 36 məhsuldar ötürmə ilə yadda qalıb.
* Lunin “Real”ın Çempionlar Liqasında 2003/04 mövsümündən bəri bir oyunda 9 və daha artıq seyv edən 2-ci qapıçısıdı. Kurtua də 2022-ci ildə - “Liverpul”la görüşdə 9 seyv etmişdi.