Fevralın 11-də Kot d’İvuarda təşkil edilən 34-cü Afrika Millətlər Kuboku (AMK) sona çatdı.

"Football-plus.az" xəbər verir ki, bir gün əvvəl yarımfinalın məğlubları olan Cənubi Afrika və Konqo DR yığmaları 3-cü yer uğrunda matçda qarşılaşdılar. Bazar günü isə Nigeriya və Kot d’İvuar arasında keçirilən finalda qitə çempionu müəyyənləşdi.

final
Nigeriya – Kot d’İvuar 1:2 (1:0)
Nigeriya: Nvabali, Acayi, Troost-Ekonq, Bassi, Ayna, Sanusi (Aribo, 86), Onyeka (Moffi, 86), İvobi (Yusuf, 79), Çukvueze (Simon, 56), Osimhen, Lukmen (İheanaço, 79).
Kot d’İvuar: Y.Fofana, Orye (Sinqo, 70), Kossunu, Konan, Ndika, Kessye, Seri (Lazar, 90+3), S.Fofana (Sanqare, 88), Qradel (U.Diakite, 70), Adinqra, Alle (Krasso, 88).
Qollar: Troost-Ekonq, 38 (1:0). Kessye, 62 (1:1). Alle, 81 (1:2).
Vərəqələr: Nvabali, 53. Orye, 54. S.Fofana, 87. Ayna, 90. Y.Fofana, 90+7 – sarı.
Hakim: Dahane Beyda (Mavritaniya).
11 fevral. Abican. 57094 tamaşaçı.

Finalçılar qitə çempionatında mübarizəyə eyni qrupda başlamışdılar. A qrupunda Nigeriya və Kot d’İvuar yığmaları arasında baş tutan matç birincilərin minimalhesablı qələbəsi ilə nəticələnmişdi. O da maraqlıdı ki, bu komandalardan heç biri Ekvatorial Qvineyanın liderliyinə mane ola bilməmişdi. Nigeriya qvineyalılarla eyni – 7 xal toplasa da, topların fərqinə görə qrupu 2-ci yerdə başa vurmuşdu. Kot d’İvuar isə 3 xalla qrupdan ən yaxşı 3-cü yeri tutan komandalardan biri kimi çıxa bilmişdi. Ekvatorial Qvineyaya rüsvayçı məğlubiyyətdən (0:4) sonra baş məşqçi Jan-Lui Qasse istefaya göndərilmiş, fransızın yerinə Emers Fae təyinat almışdı. Meydan sahiblərinin yeni çalışdırıcı ilə finala qədər irəliləməsi çoxları üçün sürpriz idi. Nigeriya isə əsasən arxa xəttinin inamlı oyunu sayəsində çempionluğa iddia edirdi.

1/8 finalda AMK-nın son çempionu olan Seneqalı mübarizədən kənarlaşdıran Kot d’İvuar yığması final matçına əla başlasa da, əlverişli şanslardan yararlana bilmədi. Nigeriyalı Nvabali qapısını bir neçə dəfə real qoldan xilas etdi. Fasilə ərəfəsində Troost-Ekonq künc zərbəsindən sonra hesabı açmaqla meydan sahiblərinin işini çətinə saldı. Ancaq Faenin komandası ikinci hissədə əzmkarlıq nümayiş etdirdi. Kessye və Alle “Brayton”da oynayan Adinqranın ötürmələri ilə hesabı “fillər”in xeyrinə dəyişdilər. Beləliklə, Kot d’İvuar yığması 1992 və 2015-ci illərdəki uğurundan sonra 3-cü dəfə Afrika çempionu oldu.

3-cü yer uğrunda oyun
Cənubi Afrika - Konqo DR 0:0, p. – 6:5
Cənubi Afrika: Uilyams, Modiba, Mudau, Kulu, Sibisi, Morena (Maşeqo, 72), Zvane (Monare, 58), Sitole, Mokuna, Mayambela (Lepasa, 89), Makqopa (Appollis, 58).
Konqo DR: Berto, Mbemba, Batubinsika, Kayembe, Tşibola (Mfulu, 46), Dianqana (Vissa, 68), Mutussami, Beey, Bonqonda (Elia, 33), Mvumpa (Mayele, 79), Banza (Bakambyu, 79).
Əsas və əlavə vaxtı qolsuz nəticlənən matçdan sonra zərurətə çevrilən penalti seriyasında qalib gələn Cənubi Afrika yığması 2000-ci ildən sonra ilk dəfə mükafatçılar sırasına düşdü. “Bafana-bafana” ləqəbli komanda 24 il əvvəl də qitə çempionatında 3-cü yeri tutmuşdu.
Bombardirlər: Nsue (Ekvatorial Qvineya) – 5, Dala (Anqola), Məhəmməd (Misir) – 4.