Yanvarın 30-da Kot d’İvuarda təşkil edilən 34-cü Afrika Millətlər Kubokunun (AMK) ilk pley-off mərhələsinə yekun vuruldu.

“Football-plus.az” xəbər verir ki, 1/8 finalın bazar ertəsi və çərşənbə axşamı keçirilən son oyunlardan sonra Kabo Verde, Kot d’İvuar, Mali və Cənubi Afrika yığmaları daha əvvəl 1/4 finalda oynamaq hüququ qazanan Anqola, Nigeriya, Konqo DR və Qvineyanın sırasına qoşuldu. Başqa sözlə, daha bir neçə favorit komanda qitə çempionatını erkən tərk etdi.

1/8 final
Kabo Verde – Mavritaniya 1:0
Mendeş, 88-p.
Kabo Verde: Vozinya, Moreyra (Semedu, 90+4), Koşta, Lopeş, Paulu, Monteyru, Lenini, Duarte (Rodrigeş, 72), Mendeş, Bebe (Santuş, 72), Kabral (Benşimol, 85).
Mavritaniya: Niass, Ueybib, Dia, L.Ba, İ.Keyta (İ-H.Ba, 79), Buna (P.Ba, 66), Bodda, Qassama (Q.Fofana, 35), Tanji (A.Kamara, 66), Koyta, Ann (Əl-Belli, 59).
Abican şəhərində keçirilən matçın nəticəsini sona yaxın təyin olunan penalti müəyyənləşdirdi. Kapitan Mendeş zərbəni yerinə yetirmək üçün təxminən iki dəqiqə götür-qoy etdi. Onun hədəfi düzgün tapması Kabo Verde yığmasının qələbəsini təmin etdi. Ədalət naminə Mavritaniyanın yaxşı təsir bağışladığını qeyd etməliyik. Lakin bir ciddi səhv bu komandaya turniri tərk etmək bahasına başa gəldi.
Seneqal - Kot d’İvuar 1:1, p. – 4:5
Diallo, 4 – Kessye, 86-p.
Seneqal: Mendi, K.Kulibali, A.Diallo (Dyenq, 118), Nyakate, Diatta, P.M.Sarr, L.Kamara (Qeye, 87), Yakobs, İ.Sarr (Ndiaye, 96), Mane, H.Diallo (Cekson, 67).
Kot d’İvuar: Y.Fofana, Orye, Kossunu (Sinqo, 116), Ndika, Konan, Sanqare (Kessye, 73), Seri, S.Fofana (Kuame, 80), Diakite (Adinqra, 74), Krasso (Alle, 73), Qradel (Pepe, 64).
Kot d’İvuar yığması ev sahibi olsa da, qrupdan ən yaxşı 3-cü yeri tutan komandalardan biri kimi çıxmışdı. Seneqal isə AMK-nın son çempionu kimi qrup oyunlarında olduqca inamlı təsir bağışlamışdı. Və təbii ki, Yamusukrodakı matçın aşkar favoriti məhz Aliu Sissenin çalışdırdığı komanda idi. Seneqallılar hesabı erkən açmaqla proqnozları doğrultmağa çox yaxın idilər. Ancaq nədənsə qoldan sonra uzun müddət qapısının toxunulmazlığı haqda düşünməyi lazım bildilər. Bununla belə, İsmaila Sarr iki dəfə hesabı artırmağa yaxın oldu. Nəticəyə ev sahiblərinin istefaya göndərilən baş məqşçisi Jan-Luis Qassenin səlahiyyətlərini yerinə yetirən Emers Faenin əvəzləmələrinin də təsiri oldu. Meydana ikinci hissədə daxil olan Alle – Kuame - Pepe üçgedişli kombinasıyası “fillər”in penalti qazanması ilə nəticələndi. Əsas vaxtın sonuna yaxın Kessye ilə cavab qolunu vuran meydan sahibləri əlavə vaxtda güclü rəqibindən heç nədə geri qalmadı. Və penalti seriyasında Nyakatenin topu dirəyə vurması son çempionun titulu itirməsinə səbəb oldu.
Mali – Burkina Faso 2:1
E.Tapsoba, 3-öz qapısına. Sinayoko, 47 – Bertrand Traore, 57-p.
Mali: Diarra, H.Traore, Kuyate, Niakate, Sako, M.Kamara (M.Fofana, 90+3), L.Kulibali (Diabate, 74), Haydara (Samasseku, 74), A.Traore (Koyta, 74), Sinayoko (Bubakar Traore, 90+3), Dumbiya.
Burkina Faso: Koffi, Kabore, Dayo, E.Tapsoba, Yaqo (Badolo, 46), Uedraoqo (Banse, 68), Ture, Sanqare (Aziz Ki, 87), A.Tapsoba (Naqalo, 46), Konate, Bertrand Traore (D.Uattara, 77).
Mali yığması Burkina Faso ilə dueldə favorit statusunu doğrultdu. Hər iki hissəyə erkən qolla başlayan malililər matçın qalibi ilə bağlı sualı daha tez cavablaya bilərdilər. Sadəcə, əlverişli imkanlar boşa verildi və rəqib ikinci hissədə penalti ilə fərqi azaltdı. Bununla belə, Erik Şelyenin komandası qələbə hesabını qorumaqla mərhələni adladı.
Mərakeş – Cənubi Afrika 0:2
Makqopa, 57. Mokoena, 90+5.
Mərakeş: Bunu, Hakimi, Agerd, Saiss, Mazraui (Attiyat-Alla, 76), Amrabat, Unay, Amallah (Harit, 60), Adli (Saybari, 60), Ən-Nəsiri, Ezzalzuli (Əl-Kaabi, 69).
Cənubi Afrika: Uilyams, Modiba, Mvala, Kekana, Mudau, Morena, Mokoena, Sitxoul (Monare, 87), Tau, Zvane (Maseko, 70), Makqopa (Lepasa, 72).
Cütün favoriti sayılan Mərakeş yığmasının Cənubi Afrika səddini keçə bilməməsi qitə çempionatının ən səs-küylü faktları sırasına daxil oldu. DÇ-2022-nin yarımfinalçısı uzun müddət hücumda ciddi nəsə edə bilmədi. Arxa xətdə inamlı görünən rəqib isə kəskin əks-hücumlara bel bağlamaqla sensasiya axtarışında idi. Nəhayət, 57-ci dəqiqədə qurulan kombinasiya cənubi afrkalıların hesabı açmasıyla nəticələndi. Daha böyük qüvvə ilə irəli atılan mərakeşlilər 84-cü dəqiqədə penalti qazandılar. Ancaq Hakimi topu tirə vurdu. Qalan vaxtda daha bir sürətli əks-hücum quran Uqo Broosun komandası ikinci qolu bayram etməyə də nail oldu.
Bu mərhələnin digər oyunlarının nəticələri: Anqola – Namibiya 3:0 (Dala, 38; 41. Mabululu, 66), Nigeriya – Kamerun 2:0 (Lukmen, 36; 90), Ekvatorial Qvineya – Qvineya 0:1 (Bayo, 90+8), Misir – Konqo DR 1:1, p. – 7:8 (Məhəmməd, 45+1-p. – Elia, 37).
Fevralın 2-3-nə təyin olunan 1/4 final oyunlarında cütlər belə formalaşıb: Nigeriya – Anqola, Konqo DR – Qvineya, Mali - Kot d’İvuar, Kabo Verde – Cənubi Afrika.