''Fənərbaxça''da Rayan Kent ilə bağlı son günlər maraqlı olaylar yaşanır.

Mövsümün əvvəlində ''Reyncers''dən heyətə cəlb edilən, amma ümidləri doğrultmayan 27 yaşlı vingerin qış transfer dönəmində ayrılacağı güman olunurdu. O, ''Latsio'' ilə müqavilə imzalamaq üçün hətta İtaliyaya da yollanmışdı. Amma ingiltərəli futbolçu son anda fikrini dəyişərək ''Fənər''də qalmağa qərar vermişdi. Sonradan onun pulunu ala bilmədiyinə görə İstanbul nəhəngindən şikayət etməyə hazırlaşdığı barədə xəbərlər peyda olmuşdu. Bu xəbərlərin fonunda ötən bazar günü böyük bir sürpriz yaşandı.

''Fənərbaxça'' - ''Alanyaspor'' matçında hesab 2:2 olarkən İsmayıl Kartal 85-ci dəqiqədə əsas qol silahı Edin Cekonu oyundan çıxararaq onu məhz Kent ilə əvəzlədi. Yəni son 12 turda meydana çıxmayan bir futbolçu xilaskar rolunda döyüşə atıldı. Amma Kent qəhrəmana çevrilə bilmədi və oyun elə 2:2 hesabı ilə bitdi. İndi isə məlum olub ki, ''Fənər'' mövsümün qalan hissəsi üçün federasiyaya göndərdiyi iştirak ərizəsinə Kenti daxil etməyib. ''Sarı-lacivərdlilər''in heyətində 16 legioner var. Limit üzündən onlardan ikisi kənar qalmalıdı. Bu iki futbolçudan biri Luan Peresdi. Bu futbolçu zatən zədə üzündən mövsümün əvvəlindən bəri ortalıqda yoxdu. Adı iştirak ərizəsinə alınmayan digər əcnəbi isə məhz Kentdi. Başqa sözlə desək, ötən tur xilaskar rolunda meydana çıxan bir futbolçu mövsümün qalan hissəsi üçün komandaya lazım olmayacaq! Kentin bu mövsüm 16 rəsmi qarşılaşmada 1 qol, 2 məhsuldar ötürməlik performans sərgilədiyini bildirək.

ƏLİ