Yığmamızın sabiq futbolçusu, vaxtıyla “Qarabağ”, “Araz-Naxçıvan”, “Kəpəz” kimi klublarda forma geymiş, hazırda U-21-də Samir Əliyevə yardım edən Emin İmaməliyevlə gündəmin bəzi aktual məsələləri ilə bağlı söhbətləşdik.

- Ölkə futbolunu izləyirsənmi? Öz dövrünüzlə indiki dövr arasında hansı dəyişikliklər var? Rəqabət səni qane edirmi?
- Bizim oynadığımız dövrdə, əlbəttə, futbol yaxşıydı, sürət də var idi. Sadəcə, bildiyiniz kimi, artıq son illərdə bütün klublarda müasir aparatlar var. Hansı ki, oyun vaxtı və ya məşq prosesi zamanı futbolçuya qoşulur. Bu aparat vasitəsiylə oyunçunun bütün göstəricilərinə baxıb, onun matçlara nə dərəcədə hazır olduğunu bilirsən. İnkişaf bundadı. Əlbəttə, indiki futbol da sürətlidi, maraqlıdı. Yəni böyük bir fərq görmürəm. Sadəcə müasir aparatlar çıxıb deyə, artıq bütün məşqçilər oyunçunun nə qədər hazır olduğunu və nə qədər güc sərf etdiyini bilir.

- Vaxtilə formasını geydiyin “Qarabağ”ın Avropa Liqasındakı şansını necə dəyərləndirirsən? “Braqa” səddini keçmək mümkün olacaqmı?
- Əvvəlcə “Qarabağ”a “Braqa” ilə görüşdə uğurlar arzulayıram. Ağdam təmsilçisi həmişə futbol ictimaiyyətini sevindirib, inanıram ki, yenə də sevindirəcək. Gözəl oyun nümayiş etdirməklə möhtəşəm tarix yazacaqlar. Komandada çatışan və ya çatışmayan məsələlərlə bağlı nəsə deyə bilmərəm. Klubun məşqçi heyəti var və mənə elə gəlir ki, vəziyyəti daha yaxşı bilirlər. Kənardan izlədyim qədər onu deyə bilərəm ki, klubun oyun və oyunçu planında heç bir çətinliyi yoxdu.

- Son günlər legioner limitinin dəyişdirilməsi müzakirə olunur. “7+4” variantından “8+3”ə keçməyi təklif edənlər var. Bu məsələyə münasibətini necədi? Limitin dəyişdirilməsinin ölkə futboluna nə xeyri olacaq?
- Legioner limitiylə bağlı onu deyə bilərəm ki, hazırda onsuz da yerli futbolçu qıtlığı var. Ona görə də əcnəbilərin sayının artırılmasını ciddi müzakirə etmək lazımdı ki, heç bir kluba və milli komandaya zərər dəyməsin. Ciddi müzakirə mövzusudu. İnşallah, doğru qərar verilər.

- Millətlər Liqasının püşkü atıldı. Milli komandamızın rəqibləri də bəlli oldu - Slovakiya, Estonya, İsveç. Səncə, yığmamızın bu qrupdakı şansı nə qədərdi?
- Hər üç komandayla millimiz qarşılaşıb, yaxşı da oyun sərgiləyib. Hətta qələbə də qazanıb. Maraqlı qrupdu. Çətin oyunlar olacaq, amma düşünürəm ki, yığmamız bu qrupda layiqincə mübarizə aparacaq.

- Bildiyin kimi, Əfran İsmayılovun təşəbbüsü ilə yığmanın sabiq futbolçuları “İnter” adlı komanda yaradıb, minifutbol çempionatında çıxış edirlər. Lakin həmin komandada sən yoxsan.
- Bununla bağlı heç bir təklif almamışam.
 
KAMAL SƏFƏR