Azərbaycan klubları üçün avrokubok mövsümü başa çatdı. “Qarabağ” ötən həftə Konfrans Liqasının pley-offunda “Gent”ə uduzaraq mübarizəni dayandırdı. Ağdamlıların Belçika klubuna məğlubiyyəti ilə bağlı yerli mediada təhlillər, yazılar dərc olundu. Bir çoxları günahı yeni transferlərdə, bəziləri isə “köhlən atlar”ın hazırlığının aşağı olmasında gördü.

Görəsən, məğlubiyyətin əsas səbəbi nədi?

Football-plus.az olaraq, bu sualı tanınmış menecer Tural Əsgərova ünvanladıq:

“Qarabağ” “Gent” səddini niyə aşa bilmədi? “Ferentsvaroş”, “Surix”, “Lex” Ağdam təmsilçisini nə üçün keçə bilmədi? Futbolda gözlənilməz nəticələr qeydə alınır. Bəzən güclü rəqibi məğlub edib, nisbətən zəifin qarşısında aciz qalırsan. Bu suala cavab vermək çox çətindi. Bakıdakı oyundan sonra bir çoxları kimi, mən də “Qarabağ”ın bu rəqibi üstələyəcəyini düşünürdüm. Görünür, hardasa yanılmışıq. Məğlubiyyətin bir çox səbəbi var. Qurban müəllim də etiraf etdi ki, komanda oyuna tam hazır deyildi. Sadəcə, birinci matçda “Gent”i keçəcəyimizə inanmışdıq. İkinci görüşdə anladıq ki, belə deyil. Komanda sözün əsl mənasında oyuna hazır deyildi. Burda söhbət təkcə futbolçuların fərdi hazırlığından getmir. Ağdam təmsilçisi kifayət qədər yenilənmiş kollektivdi. Bir il öncə “Marsel”lə matçdakı heyətlə indiki arasında çox fərq var. Heyətdə ən azı 6-7 fərqli futbolçu var idi. Bütün bunları nəzərə almaq lazımdı. Bundan əlavə, nə qədər doğru analitik təhlil olmasa belə, məncə, həmin vaxt “Qarabağ”ın günü deyildi. Bu barədə çox fikirləşmişəm. İlk dəqiqələrdə Bəhlulun qapı tirinə dəyən baş zərbəsi, penalti seriyası zamanı Quqeşaşvilinin üç zərbənin istiqamətinin tapmasına rəğmən, topu tuta bilməməsi, Şeydayevin bir neçə santimetrə görə qeydə alınmayan qol ötürməsini də nəzərə alsaq, bunu deyə bilərik. Həmin gün “Qarabağ”ın bəxti gətirmədi. Başqa xırda məqamları da nəzərə almaq lazımdı. Bir sözlə, iki oyun üçün “Gent” daha hazırlıqlı idi və mərhələni keçən tərəf oldu”.

Sosial şəbəkələrdə Ağdam təmsilçisi ilə bağlı maraqlı fikirlər səsləndirilir. Bir çoxları yeni transferlər – Adama Diakabi, Yassin Benzya və Redon Cicanın “köhlən atlar”a uyğunlaşmadığını dilə gətirir. Bəziləri isə klubun transfer xətrinə bu keçidləri etdiyini söyləyir. Bu fikirlər nə dərəcədə doğrudu? Menecer məsələyə belə münasibət bildirdi:

“Belə sualla qarşılaşacağımı ağlıma gətirməzdim. Ağdam təmsilçisinin transfer xatirinə keçidləri reallaşdırmasını düşünmək absurddu. Bunu demək üçün futboldan uzaq olmaq lazımdı. Elə olub ki, mətbuat məcbur etməyə çalışsa da, klub transfer etməyib. Diakabi, Benzya və Cica da belə keçidlərdəndi. Ümumiyyətlə, heç bir klub hansısa futbolçunu transfer edəndə bir oyunu nəzərə almır. “Qarabağ” kiminləsə razılaşanda ən azı 2 illik müqavilə bağlayır. Bütün keçidlər müəyyən müddətə hesablanır. Kimsə bir oyuna görə futbolçunu dəyərləndirirsə, bu, onun problemidi. Mən, ümumiyyətlə, bəzi mütəxəssislərin fikirləri ilə razı deyiləm.

Onlar düşünürlər ki, Diakabi, Benzya və Cica uğursuz transferlərdi. Bu nəticəyə gəlmək üçün hələ tezdi. Oyunçunun bu gün hazır olmamasından da danışmaq lazım deyil. “Qarabağ” onları “Gent”i keçmək üçün transfer etməmişdi. Ağdam təmsilçisinin ən uğurlu keçidlərindən biri Reynaldo Silva idi. Braziliyalı 7-8 ay idi futbol oynamırdı. Ciddi tənqidlərə məruz qalmışdı. Sonda necə futbolçu olduğunu gördük. Kadi də həmçinin. İlk oyunlarında ciddi tənqidlərlə qarşılaşmışdı. Hətta bəzi müxətəssislər onu uğursuz transfer adlandırırdı. Sonda gördük ki, hər şey fərqlidi. Julio Romao haqda da çox şey deyirdilər. İndi komandanın ən yaxşılarından biridi. Transferlərə qiymət vermək üçün gözləmək lazımdı. Yenə qayıdıram Benzya, Diakabi və Cica məsələsinə. Onların “Gent”lə oyundan sonra super transferlər olduğunu söyləyənlər var idi. Mən bunun tərəfdarı deyiləm. Oyunçuya bir matça görə qiymət verməzlər. Heç kim onların uğurlu və ya uğursuz olduğunu indi söyləyə bilməz. Bunu zaman göstərəcək. Və heç kim də uğursuz transferdən “sığortalanmayıb”. Nə futbolumuzun lideri “Qarabağ”, nə də autsayderləri”.

Tural bəy yekunda Ağdam təmsilçisinin skaut komandası yaratmalı olduğunu dilə gətirdi:

“Əlbəttə, bu olsa, yaxşı olar. Amma bu o qədər də asan deyil. Bu işlərin içində olan şəxs kimi söyləyə bilərəm ki, skaut heyəti qurmaq həddən artıq çətindi və xərc tələb edir. Hətta “böyük beşlik” ölkələrində çıxış edən bəzi klublarda da skaut komandası yoxdu. 2-3 skautu olanlar var. Amma komanda formalaşdıranlar çox azdı. Nəzərə almaq lazımdı ki, Azərbaycan futbolu haqda danışırıq. Yenə deyirəm, bunu etmək çox çətindi. Kifafət qədər maliyyə tələb etdiyi üçün hazırda ölkəmizdəki klubların skaut heyəti yoxdu”.

İLKİN SULTANLI