Azər Bağırov: “Mənə ilk növbədə oyunçunun kommunikasiyası önəmlidi”
1-ci divizionda çempionluğu bayram edən “Araz Naxçıvan”ın növbəti mövsümdə premyer-liqada çıxış edəcəyi gözlənilir.
Söylənilənlərə inansaq, Naxçıvan təmsilçisinin baş məşqçisi Azər Bağırov indidən 2023/24 “futbol ili”nin cizgilərini cızır. PRO kateqoriyalı mütəxxəssisin özünə yeni köməkçilər götürdüyü də gəzən söz-söhbət arasındadı. Bağırov Rail Məlikov, Rəşad Sadiqov və Araz Bağırovu korpusunda görmək istəyir.
Deyilənlərə aydınlıq gətirmək üçün Azər bəylə əlaqə saxladıq:
“Mətbuatda yazılanlarla mən də tanışam. Gəlin tələsməyək. İdman prinsiplərini nəzərə alsaq, divizonun qalibi kimi elitaya yüksəlməliyik. İndiki məqamda yalnız onu deyə bilərəm ki, adını çəkdiyiniz məşqçilərlə bağlı belə bir fikrim var”.
Kuluarlarda “Araz Naxçıvan”ın artıq bəzi futbolçularla danışıqlara başladığı da deyilir. Azər bəylə söhbətdə bu mövzuya da münasibət bildirməsini istədik:
“İndiki məqamda hansısa futbolçu ilə danışıq aparmaq nə dərəcədə düz olar? Bəli, maraqlandığımız futbolçular var. Premyer-liqa matçlarını izləyirəm. Maraq dairəmizdə olan oyunçular barədə ümumi məlumat toplayıram ki, bu da peşəkarlıq baxımından lazımdı. Onların maliyyə tələblərini öyrənirik, kollektivdə özlərini necə apardığı ilə maraqlanırıq. Mənə ilk növbədə oyunçunun kommunikasiyası önəmlidi. Ola bilər ki, yaxşı futbolçudu, ancaq kollektivlə problem yaşayırsa, onu komandaya dəvət etmək olmaz”.
“Araz Naxçıvan”ın baş məşqçisi onu da bildirdi ki, mayın 23-də Naxçıvanda çempionluqla bağlı tədbir təşkil olunacaq:
“Mövsümün son oyununu öz meydanımızda “Zaqatala”ya qarşı keçirəcəyik. Mayın 23-nə təsadüf edəcək həmin matçdan sonra həm mükafatlandırma mərasimi təşkil olunacaq, həm də böyük tədbir keçiriləcək”.
RƏŞAD
Digər xəbərlər
