Misli premyer-liqasında qış fasiləsi davam edir. Qış “transfer pəncərəsi”ndə yerli futbolçulara tələbat yüksəkdi.

Bəs görəsən, “Araz-Naxçıvan”ın 10 nömrəsi Orxan Əliyevə bu dönəmdə təkliflər varmı? Ümumiyyətlə, ölkə çempionatına yaxşı başlayan Naxçıvan təmsilçisi niyə 2-ci dövrədə uğurlarının davamını gətirə bilmədi? Cari mövsümdə artıq 5 qol vuran 28 yaşlı hücumçu ilə bu və başqa suallar ətrafında söhbətləşdik.

- “Araz-Naxçıvan” çempionata yaxşı başlasa da, bir ara hətta liderlər qrupunda olsa da, uğurların davamını gətirə bilmədi. Bunun əsas səbəbi nədi?
- Təəssüf ki, çempionata məğlubiyyətlə başladıq. Buna baxmayaraq, sonradan yaxşı oyunlar nümayiş etdirdik, qələbələr qazandıq. Udursan və ya uduzursan, fərq etməz, futbolda belə şeylər olur. Lakin hər oyuna hazır olmaq lazımdı. Biz də bunun üçün çalışırıq ki, hər oyuna hazır çıxaq və qələbə qazanaq.
- Demək olarmı ki, rəqiblər sonradan komandanızı daha yaxşı təhlil etməyə və əsas oyunçularınızı zərərsizləşdirməyə başladı ki, bu üzdən nəticələr get-gedə pisləşdi?
- Deməzdim ki, nəticələrimiz pisləşdi. Yenə də deyirəm: bu futboldu, belə şeylər çox olur. Heç kim məğlub olmaq istəmir və meydana da bunun üçün çıxmır. Sadəcə, ola bilsin ki, nəyisə düz etmirdik və alınmırdı.
- Bəs komandanın ev oyunlarını Naxçıvandan kənarda keçirməsinin çıxışınıza nə dərəcədə təsiri var? Hər halda, “doğma divalar” amilinin köməyindən məhrumsuz, “Dalğa”dakı oyunlarınızı kiçik azarkeş qrupu izləyir.
- Təbii ki, istəyərdik oyunlarımız Naxçıvanda keçirilsin. Çünki azarkeşlərimizin əksəriyyəti ordadı. Sadəcə, indi vəziyyət belədi. Bəzi səbəblərə görə alınmır və biz də bunu başa düşürük.
- Komandanın baş məşqçisi Azər Bağırov dəfələrlə Orxan Əliyevi məhz özünün futbola qazandırdığını deyir. Azər bəyin sənə təsiri nədən ibarətdi? Düşüncələrini, futbola baxışını dəyişdi?
- Əlbəttə, Azər müəllimin böyük rolu olub. Çünki onunla üç il yarımdı işləyirəm. Bunun üçün ona öz təşəkkürümü bildirirəm. İnşallah, hələ hər şey qabağdadı.
- Meydandakı indiki mövqeyindən razısanmı? Başqa hansı mövqelərdə oynaya bilərsən?
- Fikrimcə, futbolçu nə qədər çox mövqedə oynasa bilirsə, bu onun üçün böyük üstünlükdü. Mən indi hücumçu mövqeyində çıxış edirəm və bu mənim üçün rahatdı. Lakin başqa mövqeylərdə də oynamağı bacarıram. Mən hücumçuyam. Yenə də deyirəm, mənim üçün hansısa mövqeydə oynamağın önəmi yoxdu. İşimi, nə etməli olduğumu bilirəm. Yaxşı futbolçusansa, sənin üçün bu rahat olmalıdı. Qısası, heç bir problemimiz yoxdu.
- Komandanın təlim-məşq toplanışı necə gedir? Fasilədən sonra daha iddialı “Araz-Naxçıvan” görə biləcəyikmi?
- Biz də fasilədən sonra daha iddialı “Araz-Naxçıvan”ın olması üçün çalışırıq. Təlim-məşq prosesimiz yüksək səviyyədə davam edir. Yoldaşlıq oyunlarımız olacaq. Yəqin ki, yeni transfer də olacaq. Bir sözlə, hamımız çalışırıq ki, “Araz-Naxçıvan” yüksək yerlərdə olsun.
- Bir çoxları indidən “Qarabağ”ın çempion olacağını elan etməyə, ağdamlıları təbrik etməyə tələsir. Bu fikirlə razısan?
- Məncə, tələsmək lazım deyil. Heç kim heç kimə də hörmətsizlik etmək istəmir. İkinci yarı çox maraqlı olacaq. Ona görə də sadəcə, oyunlara baxıb, izləmək lazımdı.
- Qış fasiləsində artıq bir sıra keçidlər baş tutub. Xüsusilə də yerli oyunçulara maraq yüksəkdi. Bu dönəmdə sənə hansısa daha iddialı klubdan təklif olubmu?
- Belə deyim: hazırda maraqlananlar var, amma hələ ki təklif yoxdu. Çünki, mən “Araz-Naxçıvan”dayam.
- Gələcək karyeran haqda nə deyə bilərsən? Legionerlik barədə düşünürsənmi?
- Düşünürəm ki, indi bu barədə nəsə demək üçün tezdi. Əlbəttə, hər bir futbolçu legioner həyatı yaşamaq istəyir. Bu normaldı.
- “Araz-Naxçıvan”ın açar oyunçularından birisən. Hətta bəzi oyunlarda komandaya qələbə qazandıran qolların müəllifisən. Bu performansın milliyə çağrılmaq üçün kifayətdimi?
- Ümumiyyətlə, bu hər bir futbolçuya aid olmalıdı ki, o, öz üzərində daha da çox işləsin. Milliyə çağırıb-çağırmayacaqları başqa mövzudu. Buna həmişə hazır olmaq lazımdı. Mən də çalışıram ki, səhvlərim üzərində daha çox işləyim. Düşünürəm ki, hər bir futbolçunu izləyirlər. Hər an səni dəvət edə bilərlər.

KAMAL SƏFƏR