“Formula-1” üzrə dünya çempionatında mövsüm hələ martda başlayacaq. Bununla belə, bir xəbər indidən avtoidman həvəskarlarını həyəcanlandırır. Əlbəttə, söhbət son günlərin ən böyük transfer xəbərindən gedir.

"Football-plus.az" xəbər verir ki, iş ondadı ki, “Ferrari” fevralın ilk günündə hazırda “Mersedes”in şərəfini qoruyan Lüis Hemiltonla uzunmüddətli müqavilə bağladığını elan edib. Britaniyalı pilot 2024 mövsümünü də indiki komandasının heyətində keçirəcək, ancaq 2025 mövsümündən İtaliya komandasının uğurları üçün çalışacaq.

Bir neçə gün əvvəl “Mersedes” Hemiltonun 2024 mövsümünün ardından komandanı tərk edəcəyini açıqlamışdı. Britaniyalının 2013-dən bəri “gümüşü qanadlar”ın düşərgəsundə olduğunu da xatırladaq. Yeddiqat dünya çempionu ötən mövsüm 234 xalla 3-cü yeri tutub. “Kral avtoyarışları”nda indiyə qədər 103 qələbə qazanıb, 197 dəfə fəxri kürsüyə qalxıb.

Yanvarın 7-də 39 yaşını tamamlayan Lüis təqaüdə çıxmaq fikrində deyil. Tez-tez titulsuz bitirdiyi ardıcıl üç mövsümdən sonra motivasiyasını itirməsi ilə bağlı xəbərləri təkzib edir. O, 2021-ci ildə Əbu-Dabidəki qalmaqallı yarışın yalnız son dövrəsində çempionluğu Maks Ferstappenə “təhvil verdi”, 2022-də ümumi hesabda 6-cı yeri tutdu, 2023-də “Red Bull”un hər iki pilotundan geri qalmaqla 3-cü oldu. Unutmağa dəyməz ki, Hemilton son iki mövsümdə “Mersedes”in sükanı arxasında bir yarışı da öndə bitirməyib ki, buna görə dərin məyusluq yaşadığı şübhə doğurmur.

“Mersedes”in heyətində 11 mövsüm keçirən, 7 dünya çempionluğundan 6-nı bu komanda (birini də “Maklaren”lə) qazanan Hemilton dəfələrlə karyerasını məhz burda bitirmək istədiyini deyib. Amma eyni zamanda, bir ambisiyalı pilot kimi uğursuzluqlar zəncirindən sonra “Mersedes”ə kənar gözlə baxmağa başlayıb. Həm “Red Bull”un bolidləri, həm də “Ferrari” haqda çoxlu kompliment söyləməkdən çəkinməyib.

Yeri gəlmişkən, “Ferrari” düşərgəsində də daim Lüisin yüksək ustalıq səviyyəsini qeyd ediblər. Hələ 2019-da britaniyalının tezliklə İtaliya komandasının düşərgəsində görünəcəyi ilə bağlı xəbərlər yayılmağa başladı. Onda Hemilton “Mersedes”də qalsa da, hər dəfə müqaviləni yeniləmək ərəfəsində bu mövzuda intriqa alovlanırdı. Belə düşünmək olardı ki, ötən yay pilot və komanda 2025 mövsümünün sonuna qədər müqavilə bağlamaqla hər kəsi sakitləşdirməyi bacardı. Ancaq indi aydın olur ki, həmin vaxt müqavilə iki il müddətinə yox, “1+1” şərti ilə imzalanıbmış, yəni 2024 mövsümü bitəndən sonra pilotun müqaviləni ləğv etmək hüququ var imiş. Sonda elə belə də olacaq.

Bəs Hemilton – “Ferrari” anlaşması tərəflərə nə qazandıracaq? “Formula-1”in əfsanəvi komandalarından olan “Ferrari”də artıq uzun müddət dünya çempionluğuna həsrət qalmaqdan beziblər. Sonuncu belə titulu finlandiyalı Kimi Raykkonen 2007-ci ildə qazanıb, özü də həmin vaxt debütant olan Lüis Hemiltonu və “Maklaren”in ispaniyalı pilotu Fernando Alonsonu qabaqlamaqla. O vaxtdan bəri çoxları “Ferrari”də parlamağa çalışıb – ikiqat dünya çempionu Alonso, dördqat dünya çempionu, almaniyalı Sebastyan Fettel. Ancaq heç biri vitse-dünya çempionluğundan artığını bacarmayıb. Odu ki, Hemilton 8-ci dünya çempionluğunu “Ferrari” ilə qazansa, bütün zamanların əfsanəsinə çevriləcək.

Bir önəmli məqam da var. Maranellodakı bazada Lüisin yoluu həvəslə gözləyirlər, ona qucaq açıblar – komandanın rəhbəri Frederik Vasser və “Ferrari”nin prezidenti Con Elkan ilə onu çoxdankı dostluq münasibətləri bağlayır. Yaxınlarda müqavilə müddəti 2028-ci ilə qədər uzadılan Şarl Lekler komandada Lüisə rəqib olacaq potensiala malik deyil. Onun kollektivə təsir gücü hiss olunmur. Hemiltonun yerini tutacağı Karlos Saynsın müqavilə müddəti isə 2024-cü ilin sonunda bitəcək.

Artıq 2024-ə damğa vuran bu transferdən bütün tərəflər qazanacaq. Hemiltonun özü ilə yanaşı, “Ferrari”yə və ümumilikdə “Formula-1”ə də maraq artacaq.

Hemiltonun İtaliya komandasında nə qazanacağı də bəllidi. “La Gazzetta dello Sport” britaniyalının ildə 50 milyon avro qazanacağını yazır. Düzdü, bu, 39 yaşlı pilotun “Mersedes”də qazandığından azdı. “Formu1a.uno” nəşri isə Hemiltonun “Ferrari”də ilə 100 milyon dollar qazanacağını iddia edir. Bura maaşla yanaşı, sponsor pulları, imic hüququndan yararlanmaqla bağlı ödənişlər, müxtəlif bonuslar da daxildi. Bununla da yeddiqat dünya çempionu İtaliya komandasının tarixinə ən yüksək ödənişli pilotlardan biri kimi düşəcək.

Bu arada “Mersedes”in rəhbəri Tofo Volff da Hemiltonun “Ferrari”yə keçəcəyindən necə xəbər tutduğunu deyib: “Lüislə müqavilə bağlayanda qısa müddət seçmişdik, odu ki, bu hadisə mənim üçün sürpriz olmadı. Sadəcə, Lüisin bu qərarı açıqladığı vaxt bizi təəccübləndirdi. Oksforddakı evimdə əyləşib bir fincan qəhvə içdik, komandanın bazasına qayıtdıq və o mənə 2025-ci ildə “Ferrari”də çıxış etmək qərarını verdiyini dedi. Prinsipcə bununla də hər şey bitdi, biz təxminən bir saat danışdıq”.