Martın 2-də keçiriləcək Bəhreyn mərhələsi ilə “Formula-1” üzrə dünya çempionatında 2024 mövsümü start götürəcək. Start yaxınlaşdıqca avtoidmanla bağlı xəbərlərin sayının artması təbiidi. Son bir həftənin əsas xəbərlərini nəzərinizə çatdırırıq.

"Football-plus.az" xəbər verir ki, “Alfa Tauri”nin adı dəyişib. İş ondadı ki, yanvarın 24-də titul sponsorunu dəyişən komanda artıq “Visa Cash App RB” adı ilə çıxış edəcək. “Visa” şirkəri ilə müqavilə bir neçə illiyə nəzərdə tutulub. Bu komanda 2006-cı ildən bəri “Toro Rosso” adı ilə mövcud olub, 2019-da isə “Alfa Tauri” adını götürüb. “Alfa Tauri” pelotonda “Red Bull” şirkərinə məxsus olan 2-ci komandadı. Komandanın təqdimat mərasimi fevralın 8-də Las-Veqasda keçiriləcək.

Müqavilələrin yenilənməsi ilə bağlı xəbərlər də var. “Ferrari” ilə bu komandanın pilotu Şarl Lekler yeni müqaviləyə imza atıb. 2024 mövsümündən sonra qüvvəyə minəcək yeni müqavilə daha bir neçə il əməkdaşlıq etməyi nəzərdə tutur. Media da anlaşmanın 2029-cu ilə qədər olduğu yazılır.
26 yaşlı Lekler 2016-nın martında “Ferrari”nin yarış akademiyasının tərkibinə daxil olub, 2019-dan bəri komandanın əsas pilotudu.

“Maklaren”in pilotu Lando Norris də komanda ilə müqavilə müddətini uzadıb. Bu haqda xəbəri Böyük Britaniya komandasının mətbuat xidməti yayıb. Əvvəlki müqavilənin müddəti gələn ilin sonunda başa çatacaqdı. Yeni müqavilənin müddəti açıqlanmır.

2018-ci ildən bəri “Maklaren”in şərəfini qoruyan 24 yaşlı britaniyalı ötən mövsüm şəxsi hesabda 6-cı yeri tutmaqla 2021-ci ildə göstərdiyi ən yaxşı nəticəni təkrarlayıb.

Bu arada “Formula-1”in əfsanələrindən sayılan “Mersedes” pilotu Lüsi Hemilton sabiq meneceri Mark Haynsı ətrafına qaytarıb. Yeddiqat dünya çempionu ilə Hayns 2016-21-ci illər aralığında əməkdaşlıq edib. Həmin vaxt maraqlarının toqquşması fonunda yolları ayırıblar. Son iki ildə Hemiltonun işləri ilə Penni Tounun şirkəti məşğul olub, ancaq tərəflər 2023-cü ilin sonunda müddəti başa çatan müqaviləni yeniləməyi lazım bilməyib.

Hayns son vaxtlar əsasən Hemiltonun “Project 44” şirkərinin idarəçiliyi ilə məşğul olub. “Racingnews365” xəbər verir ki, mütəxəssis bundan sonra britaniyalı pilotun idman karyerasına köklənəcək ki, ona yeni mövsümdə çempionluq uğrunda mübarizə aparmaqda yardım etsin.

Xatırladaq ki, Hemilton son mövsümdə 234 xal toplamaqla şəxsi hesabda 3-cü yeri tutub.