“Qəbələ”nin indiki durumu heç də ürəkaçan deyil.

Qış fasiləsi ərəfəsində sonuncu pillələri bölüşdüyü “Kəpəz”dan artıq 5 xal geri qalır. Heç bir futbol adamı “qırmızı-qaralar”ın elitadan getməsini istəməsə də, reallıq bizə əksini deyir. Doğrudu, bölgə təmsilçiləri arasında ən yaxşı akademiyaya və infrastruktura malik bir komandanın premyer-liqadan düşməsi ölkə futbolu üçün yaxşı heç nə vəd etmir. Lakin görünən odu ki, futbol camiəsinin komanda üçün narahatlığı heç rəhbərlikdə yoxdu. Bəzi addımlar atılsa da, bir neçə yeni sima kluba cəlb olunsa da, komanda hələ də sonuncu pillədən qurtula bilmir. Bu gün ən yaxın izləyicisi “Kəpəz”lə müqayisə olunduqda “Qəbələ”nin hardasa heç şansının olmadığı görünür. Daha bir maraqlı nüans daha var. “Zirə” ilə oyundan (1:1) sonrakı mətbuat konfransında Elmar Baxşıyev heyətlə bağlı sıxıntı yaşadıqlarını dilə gətirib. Fəqət komandanın heyətinə göz yetirsək, kifayət qədər futbolçu olduğunu görərik. Ən azı başqa klublarla müqayisədə bu nəticəyə gələ bilərik. Çünki komandanın hər mövqedə alternativləri var. Əsas problem həmin mövqeylərdə çıxış edən futbolçuların özlərini göstərə bilməməsidi. Bu barədə, yəqin ki, Baxşıyev lazımi tədbirləri görür. Yoxsa oyunçu kasadığını dilə gətirmək bəhanədən başqa bir şey deyil.

KAMAL SƏFƏR