“Turan Tovuz” Bakıda işlənməmiş dörd dirək tapdı
“Turan Tovuz”un cari mövsümdə xeyli ciddi çatışmazlıqla üz-üzə qaldığını bilirsiz.
“Bozqurdlar” uzun aradan sonra sponsor tapıb maliyyə durumunu yaxşılaşdırsa da, başı bəladan qurtulmur. Necə deyərlər, biri bitməmiş digəri başlayır. Bu dəfə problemlərdən aktual ikisi haqda yeni məlumat almağa çalışdıq.
Xatırladaq ki, Misli premyer-liqasının 18-ci turunun "Turan Tovuz" - "Araz-Naxçıvan" oyunu 81-ci dəqiqədə dayandırılmışdı. Buna səbəb stadionun sol küncündə yerləşdirilən işıq dirəyinin güclü külək üzündən qazona aşması idi. Nəticədə matç ertəsi davam etmiş və meydan sahibləri inamlı qələbə qazanmışdı – 3:1. Daha sonra gündəmi zəbt edən əsas suallar problemin necə və nə vaxt aradan qaldırılacağı yönündə oldu. Bir neçə gün əvvəl klubun İdarə Heyətinin sədr müavini, həmçinin infrastruktur və maliyyə üzrə direktoru Əli Babakişiyev “Futbol+”ə mövzuyla bağlı açıqlamasında bunları demişdi:
“Aidiyyatı üzrə cəlb edilmiş ekspertlərin yekun fikirləriylə tanış olduq. Nəticə bizim üçün sürpriz olmadı. Loru dildə desək, səbəb məhz təbii fəlakətdi. Problemin həlli istiqamətində yol xəritəmiz hazırdı. Belə ki, aşan və ona paralel olan, yəni tribunaların yaxınlığında olan dirəklər yeniləriylə əvəz ediləcək. Artıq bunun üçün axtarışa başlamışıq. Qarşıdakı iki dirəkdə isə möhkəmləndirmə işləri görüləcək”.
Görəsən, təmir-bərpa prosesi necə gedir? Klub yol xəritəsinə uyğun addımlar atmaqda çətinlik çəkmir ki? Ən əsası, yeni dirəklər tapıldımı? Bu suallarla dünən yenidən Əli bəyə müraciət etdik. Məlum oldu ki, planda bəzi dəyişikliklər baş verib:
“Hazırda Azərbaycanda, daha doğrusu, Bakıda yeni, heç istifadə olunmamış dörd dirək tapmışıq. Onların alınmasıyla bağlı, demək olar ki, razılıq əldə olunub. Bir neçə gün sonra hamısı Tovuza gətiriləcək. Düzdü, əvvəl dirəklərdən, sadəcə, ikisini dəyişməyi düşünürdük. Amma əlimizə fürsət düşmüşkən hamısını yeniləməyə qərar verdik. Hər birimiz bu iş üzrə səfərbər edilmişik. İş üzrə briqadaların bir hissəsi artıq Tovuzdadı. Sabah səhər saatlarında prosesə start veriləcək. Lazımi texnika gələcək”.
Deməli, “Turan Tovuz” azarkeşləri və qonaqlar tezliklə bu komandanın şəhər stadionundakı oyunlarını axşam saatlarında da izləyə biləcək. Bəs akademiyanın inşasıyla bağlı yaranan problem nə vaxt həll olunacaq? Öncə bildirək ki, bir neçə gün öncə binanın tikilişinə icazə verilmədiyindən işlər dayandırılmışdı. Rəsmi məlumata görə, instansiyalardan biri (söhbətin Fövqəladə Hallar Nazirliyindən gedir – red). sənəd çatışmazlığına görə klubdan inşa prosesinin dayandırılmasını tələb etmişdi. Əli bəy bu məsələnin də tezliklə həll olunacağını dedi:
“Sənədləşmə prosesi də yekunlaşmaz üzrədi. Çox keçmədən binanın tikilişi bərpa olunacaq”.
KƏNAN BAHADIR
Digər xəbərlər
